មេធាវីរបស់លោក Muhyiddin Yassin (ម៉ូយីដដីន យ៉ាសស៊ីន) នៅថ្ងៃអង្គារ (ទី២៧ ខែសីហា) នេះ បានប្រាប់ថា ប្រទេសម៉ាឡេស៊ីបានចោទប្រកាន់មេដឹកនាំគណបក្សប្រឆាំង និងជាអតីតនាយករដ្ឋមន្ត្រីរូបនេះពីបទបះបោរ ពាក់ព័ន្ធនឹងបទចោទប្រមាថដល់អតីតព្រះមហាក្សត្ររបស់ប្រទេស។

លោក Muhyiddin ដែលបានដឹកនាំប្រទេសម៉ាឡេស៊ីរយៈពេល ១៧ខែ ចន្លោះឆ្នាំ២០២០ និងឆ្នាំ២០២១ ត្រូវបានតុលាការនៅភាគឦសានរដ្ឋ Kelantan ចោទប្រកាន់ពីបទបំបះបំបោរ ជុំវិញការអត្ថាធិប្បាយ ដែលត្រូវបានធ្វើឡើងនៅក្នុងសុន្ទរកថានយោបាយ ក្នុងខែនេះ។ មេធាវីរបស់លោក បានប្រាប់ថា កូនក្ដីរបស់ខ្លួន បានផ្ដល់ចម្លើយពីភាពគ្មានទោស។

ប្រទេសម៉ាឡេស៊ីអនុវត្តនូវទម្រង់រាជាធិបតេយ្យដ៏ពិសេសឯកមួយ ដែលស្តេចស៊ុលតង់ទាំង ៩អង្គរបស់ប្រទេសនេះ ប្ដូរវេនឡើងគ្រងរាជ្យ រៀងរាល់ ៥ឆ្នាំម្តង។ រាជាធិបតេយ្យដើរតួយ៉ាងសំខាន់ និងត្រូវបានប្រារព្ធឡើងដោយការគោរពយ៉ាងខ្ពងខ្ពង់។ ការកត់សម្គាល់អវិជ្ជមានណាមួយ អំពីរាជាធិបតេយ្យ អាចត្រូវបានកាត់ទោស ក្រោមច្បាប់បះបោរ តពីសម័យអាណានិគម។

គួរបញ្ជាក់ថា នៅក្នុងសុន្ទរកថានយោបាយ កាលពីថ្ងៃទី១៥ ខែសីហា លោក Muhyiddin បានចោទសួរអំពីភាពជឿជាក់របស់អតីតព្រះមហាក្សត្រ Sultan Abdullah Ri'ayatuddin Al-Mustafa Billah Shah (ស៊ុលតង់ អាប់ឌុលឡា អាល់មុសស្តាហ្វា បីលឡាហ៍ សាហ៍) បន្ទាប់ពីមានការបោះឆ្នោតសកលរបស់ម៉ាឡេស៊ី ក្នុងឆ្នាំ២០២២ ដែលបណ្តាលឲ្យសភាជាប់គាំង។

នៅក្នុងសុន្ទរកថា លោក Muhyiddin បាននិយាយថា រូបលោកបានធានាការគាំទ្រពីសមាជិកសភាគ្រប់គ្រាន់ ដើម្បីបង្កើតរដ្ឋាភិបាលបន្ទាប់ពីការបោះឆ្នោត ប៉ុន្តែបានចោទសួរថា ហេតុអ្វីបានជាព្រះមហាក្សត្រ នៅពេលនោះមិនអញ្ជើញរូបលោកឲ្យស្បថចូលកាន់តំណែងជានាយករដ្ឋមន្ត្រីរបស់ប្រទេស៕