ប្រមុខការពារជាតិហ្វីលីពីន នៅថ្ងៃអង្គារ (ទី២៧ ខែសីហា) នេះ បានថា ប្រទេសចិន គឺជា «អ្នករាំងស្ទះ» ដ៏ធំបំផុតនៃសន្តិភាព នៅក្នុងតំបន់អាស៊ីអាគ្នេយ៍ ខណៈដែលភាពតានតឹង រវាងទីក្រុងម៉ានីល និងទីក្រុងប៉េកាំង ជុំវិញជម្លោះ នៅតំបន់ថ្មប៉ប្រះទឹក និងដែនទឹក ក្នុងសមុទ្រចិនខាងត្បូង កាន់តែកើនឡើង។

លោក Gilberto Teodoro បានធ្វើការកត់សម្គាល់បែបនេះនៅក្នុងសន្និសីទនៃទីបញ្ជាការឥណ្ឌូ-ប៉ាស៊ីហ្វិករបស់សហរដ្ឋអាមេរិក បន្ទាប់ពីការប្រឈមមុខដាក់គ្នាម្តងហើយម្តងទៀត រវាងនាវាហ្វីលីពីន និងចិន នៅក្នុងផ្លូវទឹកក្នុងរយៈពេល ១២ខែកន្លងមកនេះ។

ទីក្រុងប៉េកាំងអះអាងសិទ្ធិស្ទើរតែទាំងស្រុងលើដែនសមុទ្រនេះ ដោយបានច្រានចោលការទាមទាររបស់គូប្រជែងពីប្រទេសផ្សេងទៀត ក្នុងនោះរួមមានទាំងហ្វីលីពីនផងដែរ និងសេចក្តីសម្រេចអន្តរជាតិ ដែលថា ជំហរអះអាងរបស់ខ្លួនមិនមានមូលដ្ឋានច្បាប់។ ការទាមទាររបស់ចិន រួមមានតំបន់ថ្មប៉ប្រះទឹក និងដែនទឹកនៅខាងក្នុងតំបន់សេដ្ឋកិច្ចផ្តាច់មុខរបស់ប្រទេសហ្វីលីពីន ដែលលាតសន្ធឹងប្រហែល ៣៧០គីឡូម៉ែត្រពីដែនទឹកឆ្នេរសមុទ្ររបស់ប្រទេស។

ដោយសំដៅដល់សមាគមប្រជាជាតិអាស៊ីអាគ្នេយ៍ លោក Teodoro បាននិយាយថា៖ «ប្រទេសចិន គឺជាអ្នករំខានដ៏ធំបំផុតនៃសន្តិភាពអន្តរជាតិ នៅក្នុងតំបន់អាស៊ាន»។

ដោយថ្លែងទៅកាន់អ្នកសារព័ត៌មាន លោក Teodoro បានជំរុញឲ្យប្រទេសផ្សេងទៀតលើកឡើងនូវ «អំពើខុសច្បាប់» របស់ប្រទេសចិន រហូតដល់ប្រទេសនេះ បញ្ឈប់សកម្មភាពរបស់ខ្លួន។

ការអត្ថាធិប្បាយរបស់លោកធ្វើឡើងមួយថ្ងៃ បន្ទាប់ពីប្រទេសចិន បាននិយាយថា ខ្លួនបានចាត់វិធានការគ្រប់គ្រងលើនាវាឆ្មាំសមុទ្រហ្វីលីពីន ២គ្រឿង ដែលបានចូលដែនទឹកនៅជិតតំបន់ថ្មប៉ប្រះទឹក Sabina Shoal ក្នុងកោះ Spratly។ ឆ្មាំល្បាតឆ្នេរហ្វីលីពីន បានបញ្ជូននាវាចំនួន ២គ្រឿង ដើម្បីផ្តល់សម្ភារផ្គត់ផ្គង់ដល់នាវារបស់ខ្លួន នៅឯតំបន់ថ្មប៉ប្រះទឹកនោះ៕