ប្រធានាធិបតីអាមេរិកលោក ចូ បៃដិន បាននិយាយនៅក្នុងសេចក្តីថ្លែងការណ៍របស់លោកថា អាជ្ញាធរសហរដ្ឋអាមេរិក កំពុងបញ្ជូនឧបករណ៍ទៅកាន់អ៊ុយក្រែន សម្រាប់ការជួសជុលហេដ្ឋារចនាសម្ព័ន្ធថាមពលរបស់ខ្លួន និងការពង្រឹងភាពធន់របស់វា។

មេដឹកនាំអាមេរិករូបនេះ បាននិយាយថា៖«សហរដ្ឋអាមេរិក ក៏កំពុងបង្កើនការផ្តល់ឧបករណ៍ថាមពលដល់អ៊ុយក្រែន ដើម្បីជួសជុលប្រព័ន្ធរបស់ខ្លួន និងពង្រឹងភាពធន់នៃបណ្តាញថាមពលរបស់អ៊ុយក្រែន»។

លោក បៃដិន បានសង្កត់ធ្ងន់ថា៖«សហរដ្ឋអាមេរិក នឹងបន្តដឹកនាំក្រុមចម្រុះជាង ៥០ប្រទេស ដើម្បីគាំទ្រអ៊ុយក្រែន។ ក្រុមចម្រុះនេះ កំពុងផ្តល់ឲ្យអ៊ុយក្រែននូវគ្រឿងយុទ្ធោបករណ៍ដែលត្រូវការចាំបាច់ រួមទាំងប្រព័ន្ធការពារដែនអាកាស និងប្រព័ន្ធស្ទាក់ចាប់»។ 

លោកបានបន្ថែមថា៖«ដូចដែលខ្ញុំបានប្រកាសនៅឯកិច្ចប្រជុំកំពូលរបស់អង្គការណាតូ កាលពីខែកក្កដារួចហើយ សហរដ្ឋអាមេរិក និងសម្ព័ន្ធមិត្តរបស់យើង បានផ្តល់ដល់អ៊ុយក្រែននូវគ្រឿងយុទ្ធោបករណ៍ទាំងនេះ សម្រាប់ប្រព័ន្ធការពារដែនអាកាសជាយុទ្ធសាស្ត្រចំនួន ៥បន្ថែមទៀត ហើយខ្ញុំបានផ្តល់អាទិភាពឡើងវិញនូវការនាំចេញប្រព័ន្ធការពារដែនអាកាសរបស់សហរដ្ឋអាមេរិក ដូច្នេះពួកវា ត្រូវបានបញ្ជូនទៅអ៊ុយក្រែនជាមុនសិន»។