ប៉ាគីស្ថានបានរៀបចំពិធីបុណ្យសពសម្រាប់កងកម្លាំងសន្តិសុខដែលត្រូវបានសម្លាប់នៅខេត្ត Balochistan ពេលដែលក្រុមជីវពលផ្តាច់ខ្លួន វាយប្រហារស្ថានីយ៍នគរបាល ផ្លូវដែក និងផ្លូវហាយវ៉េ ។

យោធាប៉ាគីស្ថាន និយាយថា ទាហាន និងក្រុមនគរបាល ១៤នាក់ ហើយនិងក្រុមជីវពល ២១នាក់ ត្រូវបានសម្លាប់ អំឡុងការប្រយុទ្ធគ្នា ក្រោយការវាយប្រហារមានគោលដៅលើរថយន្តក្រុង រថយន្តធំ នៅតាមផ្លូវហាយវ៉េ ។

ក្រុមមន្រ្តីអះអាងថា មនុស្សយ៉ាងហោច ៧៣នាក់ ត្រូវបានសម្លាប់អំឡុងការវាយប្រហារនេះ ។

អភិបាលខេត្ត Balochistan និយាយថា ជនស៊ីវិល ៣៨នាក់ ត្រូវបានសម្លាប់ផងដែរ ខណៈក្រុមមន្រ្តីក្នុងស្រុកនិយាយថា មនុស្ស ២៣នាក់ ក្នុងចំណោមពួកគេ ត្រូវបានសម្លាប់ អំឡុងការវាយប្រហារតាមផ្លូវ បន្ទាប់ពីក្រុមប្រដាប់អាវុធឆេកអត្តសញ្ញាណបណ្ណ មុនពេលបាញ់សម្លាប់ពួកគេ និងដុតរថយន្តចោល ។

កងទ័ពរំដោះ Baloch ដែលជាក្រុមជីវពលប្រដាប់អាវុធ បានប្រកាសទទួលស្គាល់ការវាយប្រហារនេះ ដោយពួកគេចាត់ទុកថាវាជាប្រតិបត្តិការព្យុះងងឹត ។

នៅក្នុងសេចក្តីថ្លែងការណ៍ទៅកាន់ក្រុមអ្នកសារព័ត៌មាន ពួកគេបានអះអាងថា នឹងមានការវាយប្រហារកាន់តែច្រើនជាងនេះ ប៉ុន្តែអំណះអំណាងមួយនេះ ពុំទាន់មានការបញ្ជាក់អះអាងដោយក្រុមអាជ្ញាធរនៅឡើយទេ ៕