កងកម្លាំងសន្តិសុខមកពីក្រសួងមហាផ្ទៃប្រទេសលីប៊ី ត្រូវបានដាក់ពង្រាយនៅជុំវិញធនាគារកណ្តាលប្រទេសលីប៊ី កាលពីថ្ងៃចន្ទ ក្នុងពេលមានការវិវឌ្ឍន៍ថ្មីៗ រួមទាំងការផ្អាកសេវាកម្មធនាគាររបស់ខ្លួន និងរបាយការណ៍នៃការផ្អាកការផលិតប្រេង។ ក្រុមផ្សេងៗនៅលីប៊ី បានជាប់ក្នុងការប្រជែងដណ្តើមអំណាចជុំវិញការគ្រប់គ្រងធនាគារកណ្តាល និងផលចំណូលប្រេងរបស់ប្រទេស។

ភាពតានតឹងជុំចុងក្រោយ បានលេចឡើង បន្ទាប់ពីការខិតខំប្រឹងប្រែងដោយក្រុមនយោបាយ ដើម្បីបណ្តេញប្រធានធនាគារកណ្តាលលីប៊ី (CBL) លោក Sadiq al-Kabir ដោយមានក្រុមប្រដាប់អាវុធជាគូប្រជែង បានប្រមូលផ្តុំកម្លាំងនៅភាគីនីមួយៗ។ បញ្ហានេះបានធ្វើឲ្យមានការខកចិត្ត ក្នុងចំណោមប្រជាជនលីប៊ី ដែលនិយាយថាពួកគេគ្រាន់តែចង់ទទួលបានលទ្ធភាពក្នុងការរស់នៅប្រចាំថ្ងៃរបស់ពួកគេ ដូចធម្មតា។

លោក Salem Khalil ជាអ្នករស់នៅក្រុងទ្រីប៉ូលី និយាយថា យើងទាមទារឱ្យគ្រប់នីតិវិធីធនាគារត្រឡប់ទៅដូចដើមវិញ។ ចំពោះបញ្ហានយោបាយ និងការប្រកួតប្រជែង ជុំវិញការដឹកនាំធនាគារកណ្តាល ពួកគេគួរតែដោះស្រាយបញ្ហាទាំងនេះ ក្នុងចំណោមក្រុមរបស់ពួកគេទៅ។

រដ្ឋាភិបាល ដែលមានមូលដ្ឋាននៅភាគខាងកើតប្រទេសលីប៊ី បានប្រកាសថា វាលអណ្តូងប្រេងនៅភាគខាងកើត ដែលមានផលិតកម្មស្ទើរតែទាំងអស់របស់ប្រទេសនឹងត្រូវបិទ ហើយការផលិត និងការនាំចេញនឹងត្រូវបញ្ឈប់ បន្ទាប់ពីមានជម្លោះកាន់តែខ្លាំងឡើង ជុំវិញការដឹកនាំធនាគារកណ្តាលប្រទេសលីប៊ី។

ពុំមានការបញ្ជាក់ណាមួយពីរដ្ឋាភិបាលដែលត្រូវបានទទួលស្គាល់ជាអន្តរជាតិនៅទីក្រុងទ្រីប៉ូលី ឬពីសាជីវកម្មប្រេងជាតិ ដែលគ្រប់គ្រងធនធានប្រេងរបស់ប្រទេសលីប៊ី នៅឡើយទេ។ តំបន់វាលប្រេងភាគច្រើន ស្ថិតនៅក្រោមការគ្រប់គ្រងរបស់មេបញ្ជាការយោធា លោក Khalifa Haftar ជាមេដឹកនាំកងទ័ពជាតិលីប៊ី (LNA) នៅភាគខាងកើតប្រទេស។

យោងតាមប្រភពនានាដែលដកស្រង់ដោយអង្គការនៃប្រទេសនាំចេញប្រេង (OPEC)បានឲ្យដឹងថា ការផលិតប្រេងសរុបរបស់ប្រទេសលីប៊ី បានឈានដល់ប្រហែល ១,១៨ លានបារ៉ែល ក្នុងមួយថ្ងៃក្នុងកាលពី ខែកក្កដា។