ហ្វីលីពីន៖ ស្ថានទូតជប៉ុននៅទីក្រុងម៉ានីលបាននិយាយកាលពីថ្ងៃអង្គារថា រដ្ឋាភិបាលជប៉ុនបានព្រមានពលរដ្ឋរបស់ខ្លួននៅក្នុងប្រទេសអាស៊ីអាគ្នេយ៍មួយចំនួន អំពីការវាយប្រហារភេរវកម្មដែលអាចកើតមាន។ ស្ថានទូតជប៉ុននៅទីក្រុងម៉ានីលប្រទេសហ្វីលីពីនបានអះអាងថា ការព្រមានមួយត្រូវបានចេញ ដើម្បីជូនដំណឹងដល់ប្រជាពលរដ្ឋរបស់ខ្លួនអំពីការគំរាម ប៉ុន្តែស្ថានទូតមិនអាចចែករំលែកព័ត៌មានលំអិត ឬបង្ហាញពីប្រភពព័ត៌មានរបស់ខ្លួនបាននោះទេ។
របាយការណ៍ព័ត៌មានពីប្រទេសជប៉ុន ម៉ាឡេស៊ី និងថៃបាននិយាយថា ការប្រឹក្សាយោបល់ពីបញ្ហានេះត្រូវបានបញ្ជូនកាលពីថ្ងៃចន្ទ ទី១៣ ខែកញ្ញា។ មន្ត្រីស្ថានទូតម្នាក់បានប្រាប់ទីភ្នាក់ងារព័ត៌មានហ្វីលីពីនថា រដ្ឋាភិបាលជប៉ុនបានទទួលព័ត៌មានអំពីការវាយប្រហារភេរវកម្មដែលអាចកើតមាន ប៉ុន្តែយើងមិនអាចផ្តល់ព័ត៌មានលម្អិតណាមួយនៅពេលនេះបានទេ។ ទីភ្នាក់ងារសារព័ត៌មាន AP បានរាយការណ៍ថា ក្រសួងការបរទេសជប៉ុនបានជំរុញឱ្យប្រជាពលរដ្ឋរបស់ខ្លួននៅឱ្យឆ្ងាយពីហ្វូងមនុស្ស និងកន្លែងសាសនានៅប្រទេសហ្វីលីពីន ឥណ្ឌូនេស៊ី សិង្ហបុរី ម៉ាឡេស៊ី ថៃ និងសហភាពមីយ៉ាន់ម៉ា បន្ទាប់ពីខ្លួនទទួលបានព័ត៌មានថា មានហានិភ័យកើនឡើងដូចជាការបំផ្ទុះគ្រាប់បែកអត្តឃាតជាដើម។
ទីភ្នាក់ងារព័ត៌មាន AP បាននិយាយថា ការប្រឹក្សានេះត្រូវបានបញ្ជូនទៅស្ថានទូតនៅក្នុងប្រទេសដែលពាក់ព័ន្ធ ដើម្បីចែករំលែកដល់ពលរដ្ឋជប៉ុន។ បណ្តាប្រទេសអាស៊ីអាគ្នេយ៍ដែលទទួលបានការប្រឹក្សា របស់ប្រទេសជប៉ុនបាននិយាយថា មិនមានព័ត៌មានថ្មីអំពីការគំរាមកំហែងសន្តិសុខកើនឡើង នៅក្នុងប្រទេសរបស់ពួកគេនោះទេ។ មន្ត្រីហ្វីលីពីនមកពីក្រសួងការបរទេស និងសន្តិសុខបាននិយាយថា ក្រសួងមិនទទួលបានរបាយការណ៍ផ្លូវការ ពាក់ព័ន្ធនឹងការប្រឹក្សារបស់រដ្ឋាភិបាលជប៉ុននៅឡើយ៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
