ស្របពេលដែលសង្រ្គាមស៊ូដង់ នៅតែអូសបន្លាយពេលឆ្លងផុតរយៈពេល ៥០០ថ្ងៃ ប្រតិបត្តិការជួយសង្រ្គោះ និងការគាំទ្រ នៅតែបន្តនៅប្រទេសឆាដ ដែលទទួលយកជនភៀសខ្លួនរាប់លាននាក់ ។

នៅក្នុងមន្ទីរពេទ្យបង្កើតឡើងដោយក្រុមគ្រូពេទ្យគ្មានព្រំដែន(MSF)ស្ថិតក្នុងជំរំជនភៀសខ្លួន Metche នៅភាគខាងកើតប្រទេសឆាដ មនុស្ស ២.២៨២នាក់ ទទួលបានការព្យាបាល ចាប់តាំងពីមន្ទីរពេទ្យនេះ បង្កើតឡើងកាលពីខែកញ្ញា ឆ្នាំ ២០២៣ ។

MSF និយាយនៅក្នុងសេចក្តីថ្លែងការណ៍ថា មន្ទីរពេទ្យមាន ១១៥គ្រែមួយនេះ គឺជាំទីតាំងថែសុខភាពបន្ទាប់បន្សំដ៏សំខាន់សម្រាប់មនុស្ស ២០ម៉ឺននាក់ រួមទាំងជនភៀសខ្លួនមកពីជំរំ Metche និងសហគមន៍ក្នុងស្រុក ក៏ដូចជាមនុស្សមកពីជំរំ Allacha និងជំរំ Arkoum ។

អ្នកស្រី Myriam Laroussi គឺជាអ្នកសម្របសម្រួលគម្រោងរបស់ MSF ដែលរួមទាំងការងាររយៈពេល ៨ខែនៅជំរំ Metche និយាយថា ជនភៀសខ្លួននៅជំរុំ Metche បានធ្វើដំណើរមកដល់ ក្រោយរត់ភៀសខ្លួនចេញពីទីក្រុង El Geneina តំបន់ West Darfur គឺជាទីក្រុងមួយរងផលប៉ះពាល់ដោយសារអំពើហិង្សាដ៏អាក្រក់បំផុតនៃសង្រ្គាម ។

អ្នកស្រីបន្តថា ការងារលំបាកដែលមន្ទីរពេទ្យមួយនេះប្រឈម គឺពាក់ព័ន្ធនឹងការផ្តល់ប្រភព និងទឹកដល់មន្ទីរពេទ្យ ស្របពេលជួបកង្វះខាតផ្លូវជាពិសេសអំឡុងរដូវភ្លៀងធ្លាក់ ។

សូមបញ្ជាក់ថា ជម្លោះនៅស៊ូដង់ បានចាប់ផ្តើមឡើង ពេលមានការប្រកួតប្រជែងដណ្តើមអំណាចគ្នារវាងកងទ័ពស៊ូដង់ និងកងកម្លាំងគាំទ្ររហ័ស(RSF)ដែលបានចែករំលែកអំណាចក្រោយការធ្វើរដ្ឋប្រហារ បណ្តាលឲ្យសង្រ្គាមមួយនេះ ឆាបឆេះឡើង ៕