នាយករដ្ឋមន្ត្រីជប៉ុនលោក Fumio Kishida នៅថ្ងៃអង្គារ (ទី២៧ ខែសីហា) បាននិយាយថា រដ្ឋមន្ត្រីពាក់ព័ន្ធទាំងអស់ នឹងជួបប្រជុំគ្នា នៅសប្តាហ៍ក្រោយ ដើម្បីពិភាក្សាអំពីជំហានចាំបាច់ ក្នុងការទទួលបានការព្រមព្រៀងមូលដ្ឋាន សម្រាប់ការចាប់ផ្តើមឡើងវិញនូវរោងចក្រថាមពលនុយក្លេអ៊ែរ Kashiwazaki-Kariwa របស់ក្រុមហ៊ុន Tokyo Electric Power (Tepco)។

គួរបញ្ជាក់ថា កាលពីខែធ្នូកន្លងទៅ និយតករនុយក្លេអ៊ែរជាតិ បានដកបម្រាមប្រតិបត្តិការដែលបានដាក់ចេញក្នុងឆ្នាំ២០២១ លើរោងចក្រ Kashiwazaki-Kariwa នៅភាគខាងជើងប្រទេសជប៉ុន ដោយសារការបំពានលើនីតិសុវត្ថិភាព ដោយអនុញ្ញាតឲ្យក្រុមហ៊ុន Tepco ធ្វើការឆ្ពោះទៅរកការទទួលបានការអនុញ្ញាតមូលដ្ឋាន ដើម្បីចាប់ផ្តើមដំណើរការឡើងវិញ។

ក្រុមហ៊ុន Tepco បានបង្ហាញពីការមានបំណងយ៉ាងខ្លាំងក្លា ក្នុងការធ្វើឲ្យរោងចក្រថាមពលនុយក្លេអ៊ែរដ៏ធំបំផុតរបស់ពិភពលោកមួយនេះមានដំណើរការឡើងវិញ ដើម្បីជួយកាត់បន្ថយការចំណាយប្រតិបត្តិការ ប៉ុន្តែនៅតែតម្រូវឲ្យមានការយល់ព្រមពីមូលដ្ឋាន ពោលគឺការអនុញ្ញាតពីអាជ្ញាធរ ក៏ដូចជាប្រជាពលរដ្ឋនៅតំបន់នោះ។

មន្ត្រីរដ្ឋាភិបាលម្នាក់ បានប្រាប់ថា នៅឯសន្និសីទការអនុវត្តការផ្លាស់ប្តូរបៃតង លោក Kishida បានថ្លែងថា៖ «ប្រតិបត្តិករ និងរដ្ឋាភិបាលត្រូវតែធ្វើការរួមគ្នា ដើម្បីទទួលបានការគាំទ្រពីសហគមន៍មូលដ្ឋាន ដើម្បីឲ្យមានការចាប់ផ្តើមដំណើរការឡើងវិញ»។

បើយោងតាមប្រព័ន្ធផ្សព្វផ្សាយសាធារណៈ NHK បានឲ្យដឹងថា លោក Kishida ដែលនឹងចុះចេញពីតំណែង នៅខែកញ្ញា បានប្រាប់ថា៖ «ខ្ញុំនឹងប្រឹងប្រែងឲ្យអស់ពីសមត្ថភាពក្នុងអាណត្តិរបស់ខ្ញុំដែលនៅសេសសល់ ដើម្បីជំរុញការផ្លាស់ប្តូរបៃតង ក្នុងនោះរួមទាំងការរៀបចំសម្រាប់ការចាប់ផ្តើមឡើងវិញនូវម៉ាស៊ីនរ៉េអាក់ទ័រនុយក្លេអ៊ែរ នៅភាគខាងកើតប្រទេសជប៉ុនផងដែរ»។

វាជារឿងកម្រណាស់ ក្នុងការមានកិច្ចប្រជុំថ្នាក់រដ្ឋមន្ត្រី ដែលផ្តោតលើរោងចក្រថាមពលជាក់លាក់មួយ។ រោងចក្រ Kashiwazaki-Kariwa ក្នុងខេត្ត Niigata បានផ្អាកដំណើរការតាំងពីឆ្នាំ២០១២ មកម៉្លេះ បន្ទាប់ពីមានគ្រោះមហន្តរាយ នៅរោងចក្រ Fukushima Daiichi ឆ្នាំ២០១១ ដែលនាំទៅដល់ការបិទរោងចក្រនុយក្លេអ៊ែរទាំងអស់ នៅក្នុងប្រទេសជប៉ុន នាពេលនោះ៕