យោធាអ៊ីស្រាអែល និយាយថា ពួកគេបានជួយសង្រ្គោះចំណាប់ថ្នូរម្នាក់ ដែលត្រូវបានចាប់យកទៅដោយក្រុមហាម៉ាស់ អំឡុងការវាយប្រហាររបស់ពួកគេកាលពីថ្ងៃទី ៧ ខែតុលា ឆ្នាំ ២០២៣ លើអ៊ីស្រាអែល និងចាប់យកទៅកាន់តំបន់ហ្កាហ្សា ។

 យោងតាមសេចក្តីថ្លែងការណ៍ពីកងកម្លំាងការពារអ៊ីស្រាអែល(IDF)បានឲ្យដឹងថា លោក Kaid Farhan Elkadi វ័យ ៥២ឆ្នាំ ត្រូវសង្រ្គោះបានអំឡុងប្រតិបត្តិការដ៏ស្មុគស្មាញនៅភាគខាងត្បូងតំបន់ហ្កាហ្សាស្រ្ទីប ។

 ពួកគេបន្តថា គ្មានសេចក្តីលម្អិតបន្ថែមទៀត ត្រូវបានចុះផ្សាយនោះទេ ដោយសារគិតពីសុវត្ថិភាព ចំណាប់ថ្នូររបស់ពួកយើង សន្តិសុខកងកម្លាំងរបស់ពួកយើង និងសន្តិសុខជាតិ ។

 លោក Elkadi ស្ថិតក្នុងស្ថានភាពមានស្ថិរភាព ហើយត្រូវបានបញ្ជូនទៅកាន់មន្ទីរពេទ្យ ដើម្បីពិនិត្យសុខភាព ។

 ឪពុកកូន ១១នាក់រូបនេះ មកពីភូមិ Bedouin ស្ថិតក្នុងតំបន់ Rahat នៃវាលខ្សាច់ Negev ។

 លោកបានបម្រើការងារអស់រយៈពេលជាច្រើនឆ្នាំជាឆ្មាំសន្តិសុខ នៅសង្កាត់ Kibbutz Magen ជាកន្លែងដែលគាត់ត្រូវបានគេចាប់យកទៅកាលពីរយៈពេល ១០ខែមុន ៕