ទីភ្នាក់ងារអង្គការសហប្រជាជាតិ កាលពីថ្ងៃអង្គារ បានលើកឡើងពីការរាលដាលជំងឺអុតស្វា(mpox) នៅក្នុងជំរំជនភៀសខ្លួនរបស់សាធារណរដ្ឋប្រជាធិបតេយ្យកុងហ្គោ ជាកន្លែងដែលប្រជាជនងាយនឹងឆ្លងជំងឺដោយសារតែប្រព័ន្ធការពាររាងកាយចុះខ្សោយ និងស្ថានភាពរស់នៅចង្អៀតណែន។

ទីភ្នាក់ងារជនភៀសខ្លួនរបស់អង្គការសហប្រជាជាតិ UNHCR បាននិយាយថា រហូតមកដល់ពេលនេះករណីជំងឺអុតស្វា(mpox)ដែលសង្ស័យ ចំនួន៤២ករណី ត្រូវបានគេរាយការណ៍នៅក្នុងជំរំជនភៀសខ្លួន និងមជ្ឈមណ្ឌលផ្លាស់ប្តូរនៅទីក្រុង South Kivu ភាគខាងកើតប្រទេសកុងហ្គោ ជាកន្លែងដែល មានប្រជាជនភៀសខ្លួនចូល និងជនភៀសខ្លួនក្នុងប្រទេសជិត២លាននាក់។

លោក Allen Maina ប្រធានផ្នែកសុខភាពសាធារណៈរបស់អង្គការ UNHCR បាននិយាយថា សម្រាប់អ្នកដែលគេចចេញពីអំពើហិង្សា ការអនុវត្តវិធានការជំងឺអុតស្វា(mpox) គឺជាបញ្ហាប្រឈមដ៏ធំ។ លោកនិយាយថា ពួកគេគ្មានកន្លែងសម្រាប់ដាក់ឱ្យនៅដាច់ដោយឡែកនោះទេ នៅពេលដែលពួកគេចេញរោគសញ្ញាជំងឺនេះ ហើយបុគ្គលដែលឆ្លងជំងឺ បានជ្រើសរើសដាក់ឱ្យនៅឆ្ងាយពីទីជម្រកដែលមានមនុស្សច្រើន ត្រូវទៅស្នាក់នៅទីវាលផ្សេងទៀត ដើម្បីការពារអ្នកដទៃ។

យោងតាមអង្គការសុខភាពពិភពលោក (WHO) បានប្រកាសអាសន្នសុខភាពអំពីជំងឺអុតស្វា( mpox) ក្នុងខែនេះ បន្ទាប់ពីវីរុសបំប្លែងខ្លួនថ្មីដែលគេហៅថា Clade 1b បានលេចចេញមក ប្រទេសកុងហ្គោ មានករណីជំងឺអុតស្វា (mpox) ដែលសង្ស័យច្រើនជាង ១៨.០០០ ករណី និងមានអ្នកស្លាប់ចំនួន៦១៥នាក់ នៅឆ្នាំនេះ។ ជំងឺអុតស្វា(Mpox) ដែលបណ្តាលឱ្យមានរោគសញ្ញាដូចជំងឺគ្រុនផ្តាសាយ និងដំបៅមានខ្ទុះ ត្រូវបានចម្លងតាមការរួមភេទ ប៉ុន្តែក៏អាចឆ្លងរាលដាលតាមរយៈទំនាក់ទំនងជិតស្និទ្ធជាមួយអ្នកដែលឆ្លងផងដែរ។