មេដឹកនាំកំពូលរបស់អ៊ីរ៉ង់ បានបើកទ្វារកាលពីថ្ងៃអង្គារសប្ដាហ៍នេះដើម្បីចរចាជាថ្មីជាមួយសហរដ្ឋអាមេរិកជុំវិញកម្មវិធីនុយក្លេអ៊ែរដែលមានការរីកចម្រើនយ៉ាងឆាប់រហ័សរបស់ប្រទេសលោក ដោយប្រាប់រដ្ឋាភិបាលស៊ីវិលរបស់ខ្លួនថាពុំមានគ្រោះថ្នាក់ក្នុងការចូលរួមជាមួយសត្រូវរបស់ខ្លួនឡើយ។

សុន្ទរកថារបស់លោក Ayatollah Ali Khamenei បានកំណត់បន្ទាត់ក្រហមយ៉ាងច្បាស់សម្រាប់កិច្ចពិភាក្សាណាមួយដែលធ្វើឡើងក្រោមរដ្ឋាភិបាលរបស់ប្រធានាធិបតីអ្នកកំណែទម្រង់ លោក ម៉ាស៊ូដ ប៉េហ្សេស្គីអាន (Masoud Pezeshkian) ហើយបានព្រមានជាថ្មីថាមិនត្រូវទុកចិត្តទីក្រុងវ៉ាស៊ីនតោនទេ។  

ប៉ុន្តែការអត្ថាធិប្បាយរបស់លោកឆ្លុះបញ្ចាំងពីពេលវេលានៃកិច្ចព្រមព្រៀងនុយក្លេអ៊ែរឆ្នាំ២០១៥ របស់អ៊ីរ៉ង់ជាមួយក្រុមប្រទេសមហាអំណាច ដែលបានមើលឃើញថាកម្មវិធីនុយក្លេអ៊ែររបស់ទីក្រុងតេអេរ៉ង់ត្រូវបានកាត់បន្ថយយ៉ាងខ្លាំងជាថ្នូរនឹងការដកទណ្ឌកម្មសេដ្ឋកិច្ច។ យ៉ាងណាក៏ដោយ គេនៅតែមិនទាន់ច្បាស់ថា តើលោកប្រធានាធិបតី ប៉េហ្សេស្គីអាន នឹងត្រូវបង្កើតយុទ្ធសាស្ត្រច្រើនប៉ុណ្ណា ជាពិសេសនៅពេលភាពតានតឹងនៅតែមានកម្រិតខ្ពស់នៅក្នុងតំបន់មជ្ឈិមបូព៌ាជុំវិញសង្គ្រាមអ៊ីស្រាអែល និងក្រុមហាម៉ាស និងស្របពេលសហរដ្ឋអាមេរិក ត្រៀមខ្លួនបោះឆ្នោតប្រធានាធិបតីនៅក្នុងខែវិច្ឆិកាឆ្នាំ២០២៤នេះ។   

លោក Khamenei បាននិយាយថា នេះមិនមានន័យថា យើងមិនអាចធ្វើអន្តរកម្មជាមួយសត្រូវដូចគ្នាក្នុងស្ថានភាពមួយចំនួននោះទេ ដោយសង្កត់ធ្ងន់ថា គ្មានគ្រោះថ្នាក់អ្វីឡើយ ប៉ុន្តែកុំដាក់ក្តីសង្ឃឹមរបស់អ្នកខ្លាំងពេក៕