កំពង់ឆ្នាំង៖ នៅថ្ងៃទី២៧ ខែសីហា ឆ្នាំ២០២៤ កម្លាំងខណ្ឌរដ្ឋបាលជលផល​កំពង់ឆ្នាំង ចេញ​បង្ក្រាប​បទល្មើសនេសាទ២ករណីផ្សេងគ្នា គឺរបាំងសាច់អួន១ករណី ស្ថិតក្នុងស្រុកកំពង់លែង និង​របាំងបិទភ្ជិតព្រែក១ករណី ស្ថិតក្នុងស្រុករលាប្អៀរ ខេត្តកំពង់ឆ្នាំង។

លោក លី ឡា នាយខណ្ឌរដ្ឋបាលជលផលកំពង់ឆ្នាំងបានអោយដឹងថា បើទោះជាមាន​ការ​ផ្សព្វ​ផ្សាយ​ច្បាប់​ស្តីពីជលផលញឹកញាប់ទៅដល់ប្រជានេសាទ និងការបង្ក្រាប​ជា​ញឹកញាប់​ពី​កម្លាំង​ខណ្ឌ​រដ្ឋបាលជលផលក្តី តែជនខិលខូចនៅតែឆ្លៀតឱកាសក្នុងរដូវបិទនេសាទនេះ ដាក់នូវ​ឧបករណ៍​ល្មើសច្បាប់ដូចជារបាំងស្បៃមុង និងរបាំងបិតភ្ជិតព្រែក ដែលឧបករណ៍​ទាំង​២​ខាង​លើ​នេះ ធ្វើអោយវិនាសពូជមច្ឆាជាតិយ៉ាងធ្ងន់ធ្ងរផងដែរ។

កម្លាំងខណ្ឌរដ្ឋបាលជលផលកំពង់ឆ្នាំង សង្កាត់រដ្ឋបាលជលផលជលចុងកោះ ដឹកនាំដោយ លោក អ៊ូ សោភ័ណ នាយរងខណ្ឌ កម្លាំងចូលរួមសរុបចំនួន ០៨នាក់ មធ្យោបាយម៉ាឡាស្មាច់ ០២គ្រឿង បានប្រតិបត្តិការបង្ក្រាបបទល្មើសនេសាទរបាំងលូស្បៃមុង នៅចំណុចទំនប់តាម៉េវ និងចំណុចក្រោយភូមិដូនវៀត ភូមិដូនវៀត ឃុំកំពង់ហៅ ស្រុកកំពង់លែង ខេត្តកំពង់ឆ្នាំង។ បន្ទាប់​មកក្រុមការងារបានឯកភាពគ្នារុះរើ និងបំផ្លាញវត្ថុតាងចោលនូវហ្នឹងកន្លែង។ វត្ថុតាងមានរបាំងស្បៃមុងចំនួន០៧កន្លែង ប្រវែង ២៨០ម លូស្បៃមុងចំនួន ០៧គ្រឿង បង្គោលចំនួន១៩០ដើម និងត្រីចំរុះចាក់លែងក្នុងដែននេសាទ ចំនួន ២០ គក្រ។

ដោយឡែកក្រុមសមត្ថកិច្ចផ្នែករដ្ឋបាលជលផលកំពង់ប្រាសាទ សង្កាត់រដ្ឋបាលជលផលរលាប្អៀរ បាន​រួម​សហការជាមួយអាជ្ញាធរឃុំគោគបន្ទាយប៉ុស្តិ៍នរគបាលរដ្ឋបាលគោគបន្ទាយ មធ្យោបាយ​ម៉ូតូ​ចំនួន០៨គ្រឿង កំលាំងសរុបចំនួន១៨នាក់ បាន​ចុះ​ប្រត្តិបតិការ​បង្ក្រាបបទ​ល្មើស​នេសា​ទ​ក្នុង​ភូមិ​សាស្ត្រ​ឃុំគោគបន្ទាយប្រទះឃើញការធ្វើនេសាទដោយ​ប្រើឧបករណ៍លបរួមផ្សំរបាំង​ព្រួល​កាត់​ភ្ជិត​ព្រែកនៅចំណុចព្រែករំលិច ភូមិកន្លែងភេ ឃុំគោគបន្ទាយ ស្រុករលាប្អៀរ ខេត្តកំពង់ឆ្នាំង។ បន្ទាប់ពីពិនិត្យជាក់ស្តែងសមត្ថកិច្ចចម្រុះយើងបានឯកភាពគ្នាធ្វើការរុះរើនិងបំផ្លាញចោលវត្ថុតាងនូវហ្នឹងកន្លែង ។ វត្ថុតាងមាន របាំងកាត់ភ្ជិតព្រែកចំនួន០៣កន្លែង ប្រវែង១៥ម៉ែត្រ ព្រួលចំនួន១០ផែន បង្គោលចំនួន៦០ដើម លបចំនួន៩គ្រឿង។

សូមបញ្ជាក់ជូនថា របាំងបិតភ្ជិតព្រែកនេះ កើតមានឡើងច្រើននៅក្នុងភូមិកន្លែងភេ និងភូមិ​ផ្សេងៗ​ទៀតចំណុះអោយភូមិកន្លែងភេជាច្រើនឆ្នាំមកហើយ ដែលមិន​អាច​អោយ​មាន​ត្រី​ចូល​ទៅ​ពង​កូន​បាននៅក្នុងរដូវបិទនេសាទ និងរដូវបើកនេសាទ ជនល្មើសបានដាក់បិទភ្ជិតព្រែកម្តងទៀត មិនមានត្រី១ក្បាលណាចេញរួចពីបឹងចូលទន្លេវិញទេ៕ កាំង ហុងវាស្នា