យុទ្ធនាការប្រធានាធិបតីរបស់បេក្ខភាពបក្សប្រជាធិបតេយ្យ លោកស្រី កាម៉ាឡា ហារីស (Kamala Harris) បានច្រានចោលការអះអាងរបស់លោក ដូណាល់ ត្រាំ (Donald Trump) គូប្រជែងមកពីគណបក្សសាធារណរដ្ឋ កាលពីថ្ងៃអង្គារ (២៧ សីហា) ដែលថាភាគីទាំងពីរបានយល់ព្រមក្នុងការបិទម៉ៃក្រូហ្វូននៅអំឡុងពេលជជែកដេញដោលប្រធានាធិបតីអាមេរិក នៅថ្ងៃទី១០ ខែកញ្ញា ខាងមុខ។

មន្ត្រីយុទ្ធនាការលោកស្រី Harris បាននិយាយថា បញ្ហានេះនៅតែកំពុងបន្តពិភាក្សាជាមួយបណ្តាញទូរទស្សន៍ ABC។ នៅក្នុងការបង្ហោះតាមបណ្ដាញសង្គមកាលពីថ្ងៃអង្គារ លោក Trump បាននិយាយថា កិច្ចព្រមព្រៀងមួយត្រូវបានឈានដល់ ហើយថាច្បាប់សម្រាប់ការជជែកដេញដោលនៅខែក្រោយនេះនឹងដូចគ្នានឹងការជជែកលើទូរទស្សន៍ CNN កាលពីថ្ងៃទី២៧ ខែមិថុនា ទល់ជាមួយលោកប្រធានាធិបតី Joe Biden។

យុទ្ធនាការរបស់បេក្ខភាពប្រធានាធិបតីទាំងពីរបានប៉ះទង្គិចគ្នាកាលពីថ្ងៃចន្ទ ជុំវិញការជជែកដេញដោលដែលបានព្រមព្រៀងគ្នាពីមុន ដោយក្រុមរបស់លោកស្រី Harris ចង់ឱ្យបើកម៉ៃក្រូហ្វូន ខណៈលោក Trump គំរាមដកខ្លួនបន្ទាប់ពីលើកឡើងថាទូរទស្សន៍ ABCមានភាពលំអៀង។

យុទ្ធនាការលោកស្រី Harris និយាយថាខ្លួនចង់ឱ្យប្រព័ន្ធផ្សព្វផ្សាយមួយនេះបើកម៉ៃក្រូហ្វូនរបស់បេក្ខជនពេញមួយព្រឹត្តិការណ៍ ជាជាងបិទសំឡេងនៅពេលដែលគូប្រជែងកំពុងនិយាយ ដូចនៅក្នុងការជជែកដេញដោលប្រធានាធិបតីលើកមុន។ បញ្ហា «បើកសំឡេងមីក្រូហ្វូនចោល» (Hot mic) នេះអាចជួយ ឬប៉ះពាល់ដល់បេក្ខជននយោបាយ ដោយភាគច្រើនចាប់យកការបញ្ចេញមតិខុសឆ្គងដែលពេលខ្លះមិនគួរនិយាយប្រាប់សាធារណជន៕