អ្នកនាំពាក្យទីភ្នាក់ងារគ្រប់គ្រងគ្រោះមហន្តរាយប្រទេសនីហ៊្សេរីយ៉ា បានប្រាប់សារព័ត៌មាន CNN កាលពីថ្ងៃអង្គារ (២៧ សីហា) ថាយ៉ាងហោចណាស់មនុស្ស ១៧០នាក់បានស្លាប់ និងជាង ២០០.០០០នាក់ផ្សេងទៀតត្រូវបានជម្លៀសខ្លួន បន្ទាប់ពីមានទឹកជំនន់ជាច្រើនសប្តាហ៍នៅក្នុងប្រទេសដែលមានប្រជាជនច្រើនបំផុតនៅទ្វីបអាហ្រ្វិកមួយនេះ។

យោងតាមលោក ម៉ានហ្សូ អេហ្សេឃែល (Manzo Ezekiel) អ្នកនាំពាក្យអាជ្ញាធរគ្រប់គ្រងគ្រាអាសន្នជាតិ (NEMA) បានឱ្យដឹងថា ភាគខាងជើងនីហ៊្សេរីយ៉ា បានរងការវាយប្រហារខ្លាំងបំផុតដោយទឹកជំនន់ ហើយផ្នែកផ្សេងទៀតនៃប្រទេសនៅតែស្ថិតក្នុងហានិភ័យនៅឡើយ ស្របពេលមានភ្លៀងធ្លាក់ខ្លាំង និងការកើនឡើងកម្រិតទឹកនៅទន្លេធំជាងគេចំនួនពីរគឺទន្លេនីហ្សេ (Niger) និងទន្លេ បេនវ៉េ (Benue)។

ទោះបីជាផ្នែកខ្លះនៃនីហ៊្សេរីយ៉ា ងាយនឹងជន់លិចក្នុងរដូវវស្សាក៏ដោយ ប៉ុន្តែលោក Ezekiel និយាយថា ទឹកជំនន់នៅឆ្នាំនេះត្រូវបានរាយការណ៍នៅក្នុងតំបន់ដែលកម្រមានទឹកជំនន់ពីមុនមក។ ក្រុមបរិស្ថាន បានស្តីបន្ទោសទឹកជំនន់ប្រចាំឆ្នាំរបស់ប្រទេសទៅលើហេដ្ឋារចនាសម្ព័ន្ធបង្ហូរទឹកមិនល្អ។

មនុស្សជាង ៦០០នាក់បានស្លាប់នៅក្នុងទឹកជំនន់នៅទូទាំងប្រទេសក្នុងឆ្នាំ២០២២ ដែលជាកំណត់ត្រាដ៏អាក្រក់បំផុតនៅក្នុងប្រទេសអាហ្វ្រិកខាងលិចមួយនេះក្នុងរយៈពេលជាងមួយទសវត្សរ៍។ អាជ្ញាធរបានសន្មតថា ទឹកជំនន់កើតឡើងដោយសារទឹកភ្លៀងធ្លាក់លើសពីកម្រិតមធ្យម និងការហូរហៀរនៃទំនប់ទឹក ឡាកដូ (Lagdo) ក្នុងប្រទេសកាមេរូន។

កាលពីសប្តាហ៍មុន ទីភ្នាក់ងារសេវាជលសាស្ត្រនីហ៊្សេរីយ៉ា (NIHSA) បានព្រមានថា ទឹកជន់លិចពីប្រទេសជិតខាងនីហ្សេ និងម៉ាលី «ត្រូវបានគេរំពឹងថានឹងផ្លាស់ទីបន្តិចម្តងៗចូលទៅក្នុងប្រទេសនីហ៊្សេរីយ៉ា» ខណៈជំរុញឱ្យរដ្ឋដែលមានទីតាំងនៅតាមដងទន្លេនីហ្សេ ឱ្យមានការប្រុងប្រយ័ត្ន៕