ប្រធានាធិបតីអេហ្ស៊ីប លោក អាប់ដែល ហ្វាតា អាល់ស៊ីស៊ី (Abdel-Fattah al-Sisi) និងនាយករដ្ឋមន្ត្រីអ៊ីរ៉ាក់ដែលកំពុងបំពេញទស្សនកិច្ច លោក ម៉ូហាម៉េដា សៀ អាល់ស៊ុដានី (Mohammed Shia'al-Sudani) កាលពីថ្ងៃអង្គារ បានអំពាវនាវសហគមន៍អន្តរជាតិ ដាក់សម្ពាធឲ្យកាន់តែខ្លាំង ដើម្បីបញ្ចប់កិច្ចព្រមព្រៀងឈប់បាញ់ នៅតំបន់ហ្កាហ្សាស្ទ្រីប។

ការិយាល័យប្រធានាធិបតីអេហ្ស៊ីប បាននិយាយនៅក្នុងសេចក្តីថ្លែងការណ៍មួយថា អំឡុងជំនួបមួយនៅទីក្រុងញូវ អាឡាមេន ( New Alamein) ភាគពាយ័ព្យនៃប្រទេសអេហ្ស៊ីប មេដឹកនាំទាំងពីរ បានផ្លាស់ប្តូរយោបល់លើមធ្យោបាយ ដើម្បីជួយមជ្ឈិមបូព៌ាឲ្យយកឈ្នះលើវិបត្តិដ៏ធ្ងន់ធ្ងរ ដែលគំរាមកំហែងដល់ស្ថិរភាព និងសមត្ថភាព ក្នុងតំបន់ ហើយបានអំពាវនាវរួមគ្នា ឲ្យស្ងប់ស្ងាត់ និងកាត់បន្ថយការកើនឡើងភាពតានតឹង ក្នុងតំបន់។ 

សេចក្តីថ្លែងការណ៍ បាននិយាយថា មេដឹកនាំទាំងពីរ បានគូសបញ្ជាក់អំពីតម្រូវការ ក្នុងការបញ្ចប់ស្ថានភាពមនុស្សធម៌ នៅតំបន់ហ្កាហ្សាស្ទ្រីប និងបញ្ឈប់ការកើនឡើងភាពតានតឹង ដែលកំពុងបន្តរបស់អ៊ីស្រាអែល នៅតំបន់វេសបែង។

សេចក្តីថ្លែងការណ៍នោះ បានបញ្ជាក់ថា ភាគីទាំងពីរ ក៏បានអំពាវនាវឲ្យចាប់ផ្តើមផ្លូវនយោបាយដ៏ច្បាស់លាស់ ដែលធានាដល់សិទ្ធិស្របច្បាប់និងត្រឹមត្រូវរបស់ប្រជាជនប៉ាឡេស្ទីន ក្នុងការកសាងរដ្ឋឯករាជ្យ នៅតាមបណ្តោយព្រំដែន ឆ្នាំ ១៩៦៧ ដែលមានទីក្រុងហ្ស៊េរុយសាឡឹមខាងកើត ជារដ្ឋធានីរបស់ខ្លួន ដើម្បីបង្កើតសន្តិភាព សន្តិសុខ និងការអភិវឌ្ឍនក្នុងតំបន់។