អ្នកនាំពាក្យក្រសួងការបរទេសអ៊ីរ៉ង់ លោក ណាសឺ ខាណានី (Nasser Kanaani) កាលពីថ្ងៃអង្គារ បានថ្កោលទោសការវាយប្រហារដ៏សាហាវ នាពេលថ្មីៗនេះ នៅក្នុងប្រទេសប៉ាគីស្ថាន និងប៊ួគីណាហ្វាសូ។

លោក បានធ្វើការអត្ថាធិប្បាយនៅក្នុងសេចក្តីថ្លែងការណ៍ដាច់ដោយឡែក ដែលចេញផ្សាយដោយក្រសួងដោយប្រតិកម្មទៅនឹងការវាយប្រហារជាបន្តបន្ទាប់កាលពីថ្ងៃចន្ទ នៅក្នុងខេត្តបាឡូជីស្ថាន ( Balo chistan) ភាគនិរតីនៃប្រទេសប៉ាគីស្ថាន ដែលបានសម្លាប់មនុស្សជាង ៧០នាក់ និង ជាច្រើននាក់ផ្សេងទៀត រងរបួស ហើយចំពោះការវាយប្រហារកាលពីថ្ងៃសៅរ៍ នៅក្នុងឃុំបាសាឡូហ្គូ ( Barsalogho) ខាងជើងភាគកណ្តាលនៃប្រទេសប៊ួគីណហ្វាសូ ដោយនៅក្នុងនោះ ចំនួនអ្នកស្លាប់ និងរបួសសរុប មិនទាន់ត្រូវបានគេបង្ហាញឲ្យដឹងនៅឡើយទេ។

លោក ខាណានី បានចូលរួមរំលែកទុក្ខដល់ក្រុមគ្រួសារជនរងគ្រោះ ក៏ដូចជារដ្ឋាភិបាល និងប្រជាជននៃប្រទេសទាំងពីរ ហើយបានបួងសួងសុំអ្នករងរបួសក្នុងការវាយប្រហារ ឲ្យឆាប់ជាសះស្បើយ។ 

ដោយអត្ថាធិប្បាយលើការវាយប្រហារនៅក្នុងប្រទេសប៉ាគីស្ថាន លោកបាននិយាយថា អ៊ីរ៉ង់ថ្កោលទោស និងបដិសេធរាល់ទម្រង់នៃអំពើភេរវកម្ម និងបន្តគាំទ្ររដ្ឋាភិបាល និងប្រជាជនប៉ាគីស្ថាន ដែលជា«បងប្អូន» ក្នុងដំណើរការប្រយុទ្ធប្រឆាំងនឹងអំពើភេរវកម្ម។