រដ្ឋអាជ្ញាសហព័ន្ធ បានប្រកាសថា កុបករដំបូងគេដែលបានរំលោភចូលវិមានកាពីតូលរបស់សហរដ្ឋអាមេរិក កាលថ្ងៃទី៦ ខែមករា ឆ្នាំ២០២១ ត្រូវបានកាត់ទោសឲ្យជាប់ពន្ធនាគារជាង ៤ឆ្នាំ កាលពីថ្ងៃអង្គារ (ទី២៧ ខែសីហា)។

គួរបញ្ជាក់ថា កាលពីខែមីនា គណៈវិនិច្ឆ័យសហព័ន្ធ បានរកឃើញថា លោក Michael Sparks វ័យ ៤៧ឆ្នាំ មកពីទីក្រុង Elizabethtown របស់រដ្ឋ Kentucky មានទោស ជុំវិញការចោទប្រកាន់បទល្មើសឧក្រិដ្ឋពីបទរារាំងដំណើរការនីតិវិធីផ្លូវការ និងបង្កចលាចលស៊ីវិល រួមជាមួយនឹងការចោទប្រកាន់បទមជ្ឈិមជាច្រើនទៀត ពាក់ព័ន្ធនឹងការស្ថិតនៅក្នុងបរិវេណអគារកាពីតូល កាលពីថ្ងៃទី៦ ខែមករានោះ។

កាលពីថ្ងៃទី២៧ ខែសីហា លោកចៅក្រម Timothy J. Kelly នៃតុលាការសហព័ន្ធអាមេរិក ក្នុងទីក្រុង Washington បានកាត់ទោសជនជាប់ចោទឲ្យជាប់ពន្ធនាគារ ៥៣ខែ និងបង្គាប់ឲ្យរូបគេបង់ប្រាក់ពិន័យចំនួន ២.០០០ដុល្លារ។ រដ្ឋអាជ្ញាបានប្រាប់បន្ថែមថា លោក Sparks នឹងត្រូវបានដោះលែងដោយមានលក្ខខណ្ឌតាមឃ្លាំមើលរយៈពេល ៣ឆ្នាំ បន្ទាប់ពីរយៈពេលជាបពន្ធនាគាររបស់លោកបានបញ្ចប់។

គួរបញ្ជាក់ថា លោក Sparks ស្ថិតក្នុងចំណោមក្រុមកុបករដំបូងគេ ដែលប្រឈមជាមួយមន្ត្រីនគរបាលរបស់វិមានកាពីតូល គឺលោក Eugene Goodman ដែលបានជួយរារាំងក្រុមមនុស្សដ៏ច្រើនសន្ធឹកសន្ធាប់មិនឲ្យចូលទៅដល់សមាជិកសភា។

លោក Sparks គឺជាមនុស្សចុងក្រោយបង្អស់ ដែលត្រូវបានកាត់ទោស ក្នុងចំណោមមនុស្សជាង ១.៣០០នាក់ ដែលក្រសួងយុត្តិធម៌អាមេរិកបានចោទប្រកាន់ ពាក់ព័ន្ធនឹងកុបកម្ម នៅវិមានកាពីតូល កាលពីថ្ងៃទី៦ ខែមករា ឆ្នាំ២០២១៕