ប្រព័ន្ធផ្សព្វផ្សាយរដ្ឋ នៅថ្ងៃពុធ (ទី២៨ ខែសីហា) នេះ បានឲ្យដឹងថា មេដឹកនាំកូរ៉េខាងជើងលោក គីម ជុងអ៊ុន (Kim Jong Un) បានទៅត្រួតពិនិត្យការបាញ់សាកល្បងជើងទម្ររ៉ូក្កែតច្រើនប្រភេទទំហំ ២៤០មីលីម៉ែត្រ ដែលបំពាក់ដោយ «ប្រព័ន្ធណែនាំ ឬប្រព័ន្ធតម្រង់គោលដៅថ្មី» ខណៈទីក្រុងព្យុងយ៉ាងបន្តអភិវឌ្ឍឃ្លាំងអាវុធរបស់ខ្លួន។

ការប្រកាសនេះកើតឡើងប្រហែល ៣ខែ បន្ទាប់ពីកូរ៉េខាងជើង បានប្រាប់ថា ខ្លួននឹងបំពាក់អាវុធដល់យោធារបស់ខ្លួនជាមួយនឹងគ្រាប់រ៉ូក្កែតច្រើនប្រភេទទំហំ ២៤០មីលីម៉ែត្រ ដែលត្រូវបានគេដឹងថា មានសមត្ថភាពវាយប្រហារទីក្រុងសេអ៊ូលរបស់កូរ៉េខាងត្បូង និងតំបន់ក្បែរៗនោះ។

គួរបញ្ជាក់ថា ប្រទេសឯកោដែលមានអាវុធនុយក្លេអ៊ែរមួយនេះ ថ្មីៗនេះ បានពង្រឹងទំនាក់ទំនងយោធាជាមួយទីក្រុងមូស្គូ ហើយអ្នកវិភាគ បានលើកឡើងថា កូរ៉េខាងជើងអាចនឹងធ្វើការសាកល្បង និងបង្កើនការផលិតកាំភ្លើងធំ និងមីស៊ីលតម្រង់គគោលដៅ មុនពេលបញ្ជូនអាវុធទាំងនោះទៅឲ្យរុស្ស៊ី ដើម្បីយកទៅប្រើប្រាស់ នៅក្នុងប្រទេសអ៊ុយក្រែន។

សហរដ្ឋអាមេរិក និងទីក្រុងសេអ៊ូល បានចោទប្រកាន់កូរ៉េខាងជើងថា បានផ្គត់ផ្គង់គ្រាប់រំសេវ និងមីស៊ីលសម្រាប់កិច្ចប្រឹងប្រែងធ្វើសង្គ្រាមរបស់រុស្ស៊ី ជាការអះអាងដែលក្រុងព្យុងយ៉ាងបានហៅថា «គ្មានមូលដ្ឋានច្បាស់លាស់»។

ការបាញ់សាកល្បងនេះ បានកើតមានឡើងនៅពេលដែលកូរ៉េខាងត្បូង និងសហរដ្ឋអាមេរិក បាន និងកំពុងធ្វើសមយុទ្ធយោធារួមគ្នាប្រចាំឆ្នាំឆ្មោះ Ulchi Freedom Shield ដែលដំណើរការរហូតដល់ថ្ងៃព្រហស្បតិ៍ ដោយការធ្វើសមយុទ្ធថ្មីនេះ ត្រូវបានធ្វើឡើងក្នុងគោលបំណងទប់ទល់នឹងកូរ៉េខាងជើងដែលមានអាវុធនុយក្លេអ៊ែរ៕