​បាល់ទាត់៖ ក្រុម​មាន់​ខ្នាយ​មាស Tottenham Hostspur បាន​ហ្វឹកហាត់​នៅ​ឯ​មូលដ្ឋាន Enfield របស់​ខ្លួន​នៅ​ថ្ងៃ​ពុធ​ម្សិលមិញ​ មុននឹង​ធ្វើដំណើរ​ទៅ​ភាគ​ខាងជើង​ប្រទេស​បារាំង ​ដើម្បី​ត្រៀមខ្លួន​សម្រាប់​ការ​ប្រកួត​បើកឆាក​ក្នុង​ពូ​ល G នៃ​ពានរង្វាន់ Europa Conference League ជួប​ជាមួយ​ម្ចាស់ផ្ទះ Rennes។​

​សន្ទុះ​នៃ​រដូវ​កាល​ដំបូង​សម្រាប់​ក្រុម​របស់លោក Nuno Espirito Santo ចាប់ផ្តើម​ដំបូង​បានល្អ​តែ​ចុង​សប្តាហ៍​កន្លងទៅ​បែរ​ជា​បរាជ័យ​នៅ​ទឹកដី Crystal Palace ក្នុង​ក្របខ័ណ្ឌ Premier League ជាមួយនឹង​បរាជ័យ ៣-០ ដែល​បានធ្វើឱ្យ Spurs ធ្លាក់​ពី​ចំណាត់ថ្នាក់​កំពូល​ទៅ​លេខ​៧។​ ​លោក Nuno សង្ឃឹមថានឹង​ត្រលប់​រកបាន​ជ័យជំនះ​វិញ​នៅពេល​ជួប​ជាមួយ Rennes រាត្រី​នេះ​ដែល​កំពុង​ឈរ​ពាក់កណ្តាល​តារាង​នៅ​ក្របខណ្ឌ​បារាំង Ligue 1 ក្រោយ​ចាញ់ ២ប្រកួត​ជាប់​គ្នា​។

Spurs ធ្វើដំណើរ​ទៅ​ទឹកដី​បារាំង​ដោយ​មិនមាន​វត្តមាន​ខ្សែប្រយុទ្ធ​កូរ៉េ Heung-min Son ឡើយ​ដោយ​មិនទាន់​ជាសះស្បើយ​ពី​ការរង​របួស​កំភួនជើង។​ ​ចំណែកឯ​កីឡា​ករ ៣រូប​ដែល​មកពី​តំបន់​អាមេរិក​ខាងត្បូង​នោះ​រួមមាន Giovani Lo Celso, Cristian Romero និង Davinson Sanchez បច្ចុប្បន្នកំពុង​ហ្វឹកហាត់​នៅ​ប្រទេស​ក្រូ​អាស៊ី​។ ​ទោះយ៉ាងណា​ក្តី Steven Bergwijn ដែល​ខកខាន​ការប្រកួត​ពេល​ចាញ់ Crystal Palace ដោយមាន​បញ្ហា​កជើង​បាន​ចូលរួម​ក្នុងការ​ហ្វឹកហាត់​វិញ​៕

​អត្ថបទ​៖​នាង សុភា​វុ​ធ