អ្នកនាំពាក្យមន្ទីរបញ្ចកោណ បាននិយាយកាលពីថ្ងៃអង្គារថា សហរដ្ឋអាមេរិក ចាត់ទុកការគំរាមកំហែងពីអ្វីដែលកូរ៉េខាងជើងហៅថា «យានដ្រូនអត្តឃាត»ថា ធ្ងន់ធ្ងរ ដោយបាបញ្ជាក់ឡើងវិញនូវការប្តេជ្ញាចិត្តរបស់ទីក្រុងវ៉ាស៊ីនតោន ក្នុងកិច្ចសហប្រតិបត្តិការជាមួយកូរ៉េខាងត្បូង និងសម្ព័ន្ធមិត្តដទៃទៀត ដើម្បីធានាសន្តិសុខ ក្នុងតំបន់។

ប្រព័ន្ធផ្សព្វផ្សាយរដ្ឋរបស់កូរ៉េខាងជើង បានរាយការណ៍កាលពីថ្ងៃចន្ទថា មេដឹកនាំលោក គីម ជុងអ៊ុន បានត្រួតពិនិត្យការតេស្តសមត្ថភាពរបស់យានដ្រូនជាច្រើនគ្រឿង កាលពីថ្ងៃសៅរ៍ ដោយអំពាវនាវឲ្យមានការអភិវឌ្ឍន និងការផលិតយានដ្រូនអត្តឃាតបន្ថែមទៀត ដើម្បីជំរុញការត្រៀមខ្លួនធ្វើសង្រ្គាមរបស់ប្រទេសនេះ។

លោកឧត្តមសេនីយ៍ឯក ផាត រ៉ៃឌឺ (Pat Ryder) អ្នកនាំពាក្យមន្ទីរបញ្ចកោណ បានប្រាប់សន្និសីទសារព័ត៌មានមួយថា៖«យើងច្បាស់ជាចាត់ទុកការគំរាមកំហែងនេះថា ពិតជាធ្ងន់ធ្ងរ ហើយវាជាអ្វីដែលយើងនឹងបន្តតាមដាន»។

លោកបានបន្ថែមថា៖«ខ្ញុំនឹងសន្និដ្ឋាន ដោយនិយាយថា យើងនឹងបន្តពិភាក្សាយ៉ាងជិតស្និទ្ធជាមួយកូរ៉េខាងត្បូង និងជប៉ុន និងដៃគូ និងសម្ព័ន្ធមិត្តផ្សេងទៀត នៅក្នុងតំបន់ ដើម្បីធានាថា ការការពាររួមរបស់យើង នៅតែរឹងមាំ»។ 

លោក រ៉ៃឌឺ ក៏បាននិយាយផងដែរថា លោកបានយល់ថា វាគួរឲ្យចាប់អារម្មណ៍ណាស់ ដែលបានឃើញទីក្រុងព្យុងយ៉ាង ពិពណ៌នាអំពីអ្វីដែលត្រូវបានគេស្គាល់ថាជា«យានដ្រូនវាយប្រហារផ្លូវមួយ» ដែលជា  យានដ្រូនអត្តឃាត។