​កូរ៉េខាងជើង៖ យោង​តាម​សារព័ត៌មាន​រដ្ឋមន្ត្រី​ជាន់ខ្ពស់​កូរ៉េខាងជើង​ បាន​និយាយ​កាលពី​ថ្ងៃ​ពុធ​ ទី១៥ ខែ​កញ្ញា​ថា ​ការ​អត្ថាធិប្បាយ​របស់​លោក​ប្រធានាធិបតី​កូរ៉េខាងត្បូង​ Moon Jae-in ដែល​ថា ​ប្រព័ន្ធ​មី​ស៊ី​ល​ថ្មី​របស់​កូរ៉េខាងត្បូង​អាច​រារាំង​កូរ៉េខាងជើង ​គឺជា​រឿង​មិន​សម​ហេតុផល និង​គួរ​ឱ្យ​សោក​ស្តាយ និង​អាច​ប៉ះពាល់​ដល់​ទំនាក់ទំនង​ប្រទេស​ទាំង​២​។​

​ទីភ្នាក់ងារសារព័ត៌មាន​រដ្ឋ KCNA បាន​រាយការណ៍​ថា លោកស្រី Kim Yo Jong ប្អូនស្រី​របស់​មេដឹកនាំ Kim Jong Un បាន​និយាយ​ថា ​សុន្ទរកថា​របស់​លោក Moon ដែល​បាន​ធ្វើឡើង​ក្នុង​ពេល​បាញ់​សាក​ល្បង​មី​ស៊ី​ល​បាលី​ស្ទីក ​បាញ់​ចេញពី​នាវាមុជទឹក​ថ្មី​របស់​កូរ៉េខាងត្បូង​កាលពី​ថ្ងៃ​ពុធ​គឺ​មិន​សមរម្យ​ទេ ហើយ​អាច​នាំឱ្យមាន​ការបែកបាក់​ប្រសិនបើ​លោក Moon នៅតែ​បន្ត​និយាយ​បង្កាច់បង្ខូច​កូរ៉េខាងជើង​។​ ​ប្អូនស្រី​ដ៏​មានអំណាច​របស់​មេដឹកនាំ​កូរ៉េខាងជើង​ Kim Jong Un កាលពី​ថ្ងៃ​ពុធ​បាន​រិះគន់​ប្រធានាធិបតី​កូរ៉េខាងត្បូង ​និង​បាន​គំរាមកំហែង​ “បំផ្លាញ​ទាំងស្រុង​” នូវ​ទំនាក់ទំនង​ទ្វេភាគី​ បន្ទាប់ពី​ប្រទេស​ទាំង​ពីរបាន​សាកល្បង​មី​ស៊ី​ល​បាលី​ស្ទីក​ត្រឹមតែ​ប៉ុន្មាន​ម៉ោង​ប៉ុណ្ណោះ​។​ កូរ៉េខាងជើង និង​​កូរ៉េខាងត្បូងបាន​បង្កើន​ការសាកល្បង​មី​ស៊ី​ល ខណៈ​ការរត់​ប្រណាំង​សព្វាវុធកាន់តែ​ឡើងក​ម្តៅ​។ ​ទាំង​កូរ៉េខាងជើង​ និង​កូរ៉េខាងត្បូង​បាញ់​មី​ស៊ី​ល​បាលី​ស្ទីក ខណៈ​ភាព​តានតឹង​កើនឡើង​នៅ​ឧបទ្វីប​៕

អត្ថបទ៖ សុខមាន