អគ្គនាយកទីភ្នាក់ងារថាមពលបរមាណូអន្តរជាតិ (IAEA) លោក Rafael Grossi កាលពីថ្ងៃអង្គារ បានព្រមានពីហានិភ័យនៃឧប្បត្តិហេតុនុយក្លេអ៊ែរ នៅរោងចក្រថាមពលនុយក្លេអ៊ែរនៅតំបន់ឃើស Kursk ដោយសារជម្លោះនៅក្បែរនោះ។

លោក Grossi បាននិយាយបន្ទាប់ពីបានទៅទស្សនកិច្ចរោងចក្រនៅតំបន់ឃើសរបស់រុស្ស៊ី តាមការអញ្ជើញរបស់ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) ដើម្បីវាយតម្លៃស្ថានភាព និងធ្វើការជាមួយសហការីរុស្ស៊ីអំពីដំណោះស្រាយចំពោះបញ្ហាបច្ចុប្បន្នថា «មានហានិភ័យនៃឧប្បត្តិហេតុនុយក្លេអ៊ែរនៅទីនេះ» ។

បន្ទាប់ពីដំណើរទស្សនកិច្ចរបស់លោកទៅកាន់កន្លែងសំខាន់ៗរបស់ខ្លួន លោក Grossi បានកត់សម្គាល់ថា រោងចក្រនុយក្លេអ៊ែរ កំពុងដំណើរការក្រោមលក្ខខណ្ឌស្ទើរតែធម្មតា។

លោក Grossi បានបញ្ជាក់ថា លោកត្រូវបានគេជូនដំណឹងអំពីការប៉ុនប៉ងវាយប្រហារដោយយានដ្រូនលើគ្រឿងបរិក្ខាររបស់រោងចក្រ ដោយបន្ថែមថា លោកផ្ទាល់បានឃើញ «ដាននៃការវាយប្រហារទាំងនេះ»។ លោកបានកត់សម្គាល់ថា សកម្មភាពយោធានៅក្បែររោងចក្រនុយក្លេអ៊ែរនៅទីបំផុត បានបង្កើនការព្រួយបារម្ភផ្នែកសន្តិសុខ។