រជ្ជទាយាទ និងជានាយករដ្ឋមន្រ្តីអារ៉ាប៊ីសាអូឌីតព្រះអង្គម្ចាស់ Mohammed bin Salman បានជួបជាមួយប្រធានអាជ្ញាធរប៉ាឡេស្ទីនលោក Mahmoud Abbas នៅទីក្រុង Riyadh កាលពីថ្ងៃអង្គារ ។

អំឡុងជំនួបនោះ មេដឹកនាំទាំង ២ បានពិភាក្សាលើស្ថានភាពកើនឡើងនៃជម្លោះយោធានៅតំបន់ហ្កាហ្សាស្រ្ទីប ។

រជ្ជទាយាទ បានធ្វើការសង្កត់ធ្ងន់ពីកិច្ចខិតខំនៅបន្តរបស់អារ៉ាប៊ីសាអូឌីត នៅក្នុងទំនាក់ទំនងជាមួយភាគីអន្តរជាតិ និងក្នុងតំបន់ទាំងអស់ ដើម្បីបញ្ឈប់ការឡើងកម្តៅភាពតានតឹង ។

ទ្រង់បានបញ្ជាក់ឡើងវិញពីការគាំទ្រឥតឈប់ឈររបស់អារ៉ាប៊ីសាអូឌីត សម្រាប់ជនប៉ាឡេស្ទីន ឲ្យទទួលបានសិទ្ធិស្របច្បាប់របស់ពួកគេ សម្រាប់ជីវិតសមរម្យ ក៏ដូចជាសម្រេចបានក្តីសង្ឃឹម និងសេចក្តីប៉ងប្រាថ្នារបស់ពួកគេ ហើយនិងធានាបានសន្តិភាពដ៏យុត្តិធម៌ និងយូរអង្វែង ។

ជំនួបមួយនេះ ត្រូវបានចូលរួមផងដែរដោយរដ្ឋមន្រ្តីក្រសួងការពារជាតិអារ៉ាប៊ីសាអូឌីត ព្រះអង្គម្ចាស់ Khalid bin Salman រដ្ឋមន្រ្តីការបរទេសអារ៉ាប៊ីសាអូឌីតព្រះអង្គម្ចាស់ Faisal bin Farhan ប្រធានអគ្គនាយកដ្ឋានចារកិច្ចលោក Khalid Al-Humaidan និងឯកអគ្គរាជ្យទូតអារ៉ាប៊ីសាអូឌីតប្រចាំនៅប្រទេសហ្សកដានីលោក Naif bin Bandar Al-Sudairy ដែលបម្រើការងារជាឯកអគ្គរាជទូតប្រចាំនៅប៉ាឡេស្ទីនផងដែរ ៕