ប្រភពមួយពីតុលាការ នៅថ្ងៃពុធ (ទី២៨ ខែសីហា) នេះ បានប្រាប់ឲ្យដឹងថា រដ្ឋអាជ្ញាអ៊ីតាលីកំពុងស៊ើបអង្កេតសមាជិកនាវិក ២នាក់បន្ថែមទៀត មកពីទូកកម្សាន្តរបស់មហាសេដ្ឋីបច្ចេកវិទ្យាអង់គ្លេស គឺលោក Mike Lynch រួមជាមួយនឹងកាពីទែនរបស់ទូកនេះ ពាក់ព័ន្ធនឹងការលិចនាវាកម្សាន្ត កាលពីមួយសប្តាហ៍មុន។

លោក Lynch និងមនុស្ស ៦នាក់ផ្សេងទៀត បានបាត់បង់ជីវិត នៅពេលដែលនាវា Bayesian ដែលជាទូកកម្សាន្តមានទង់ជាតិអង់គ្លេសប្រវែង ៥៦ម៉ែត្រ បានក្រឡាប់ និងលិច កាលពីថ្ងៃទី១៩ ខែសីហា ដោយហេតុការណ៍នោះ កើតឡើងក្នុងរង្វង់រយៈពេលប៉ុន្មាននាទីបន្ទាប់ពីទូកនោះត្រូវបានវាយប្រហារដោយព្យុះ នៅមុនព្រឹកព្រលឹម ខណៈពេលដែលបោះយុថ្កា នៅភាគខាងជើងកោះ Sicily។

កាលពីថ្ងៃចន្ទ (ទី២៦ ខែសីហា) កាពីទែនជនជាតិនូវែលសេឡង់ គឺលោក James Cutfield វ័យ ៥១ឆ្នាំ ត្រូវបានដាក់ឲ្យស្ថិតក្រោមការស៊ើបអង្កេតពីបទឃាតកម្ម និងធ្វើឲ្យនាវាលិច។ លោក Cutfield បានបដិសេធមិនឆ្លើយតបទៅកាន់រដ្ឋអាជ្ញា ក្នុងអំឡុងពេលត្រូវបានសាកសួរ កាលពីថ្ងៃអង្គារ (ទី២៧ ខែសីហា)។

ប្រភពបានឲ្យដឹងថា វិស្វករនាវា លោក Tim Parker Eaton និងអ្នកបើកនាវា លោក Matthew Griffith កំពុងត្រូវបានស៊ើបអង្កេត ជុំវិញឧក្រិដ្ឋកម្មដូចគ្នា ដោយបន្ថែមថា លោក Parker Eaton ត្រូវបានគេសង្ស័យថា មិនបានការពារបន្ទប់ម៉ាស៊ីន និងប្រព័ន្ធប្រតិបត្តិការរបស់នាវា។

ប្រភពដដែលបានបន្តថា លោក Griffith កំពុងតែមើលការខុសត្រូវនៅយប់ថ្ងៃកើតហេតុនោះ។ ការត្រូវបានស៊ើបអង្កេតមិនបង្ហាញថា មានកំហុសទេ ហើយក៏មិនមានន័យថា ការចោទប្រកាន់ផ្លូវការ នឹងកើតមានឡើងនោះដែរ។

គួរបញ្ជាក់ថា ការលិចនេះបានបង្កការងឿងឆ្ងល់យ៉ាងខ្លាំងដល់អ្នកជំនាញខាងកងទ័ពជើងទឹក ដែលបាននិយាយថា នាវាដូចជា Bayesian នេះ ដែលត្រូវសាងសង់ដោយក្រុមហ៊ុនផលិតនាវាលំដាប់ខ្ពស់របស់អ៊ីតាលី គឺក្រុមហ៊ុន Perini គួរតែទប់ទល់នឹងព្យុះនេះបាន ហើយក្នុងករណីណាក៏ដោយ ក៏មិនគួរលិចលឿនដូចនេះនោះដែរ៕