តម្លៃអាហារពិតថ្លៃខ្លាំងណាស់នៅទីក្រុងហ្កាហ្សា ហើយជនប៉ាឡេស្ទីននៅតំបន់ភាគខាងជើងហ្កាហ្សាស្រ្ទីប ជាទីដែលមនុស្សរងផលប៉ះពាល់ខ្លាំងជាងគេបំផុតដោយសារភាពអត់ឃ្លាន និយាយថា ពួកគេស្ទើតែមិនអាចរកអ្វីមកទទួលទានបាន ។

 ពលរដ្ឋហ្កាហ្សា និយាយថា របស់ដែលអាចរកបាននៅក្នុងផ្សារ គឺលក់ក្នុងតម្លៃខ្ពស់ខ្លាំងណាស់ បើធៀបនឹងតម្លៃធ្លាប់មានកាលមុនសង្រ្គាម ។

 លោក Abu Issam គឺជាជនប៉ាឡេស្ទីនមួយរូបរស់នៅតំបន់ភាគខាងជើងហ្កាហ្សា និយាយថា តម្លៃអាហារនៅទីនេះនៅតំបន់ភាគខាងជើងហ្កាហ្សា ពិតជាមិនគួរឲ្យជឿនោះទេ ។ អ្វីៗគឺថ្លៃខ្លាំងណាស់នៅទីនេះ សូម្បីតែអ្នកទិញស៊ុតមួយគ្រាប់ ក៏អ្នកត្រូវការចំណាយប្រាក់ ៣,២៨ដុល្លារដែរ ។ គ្មានប្រាក់ចំណូលនោះទេ របស់ចាំបាច់មូលដ្ឋាន គ្មាននោះទេ ពួកយើងគ្មានបន្លែ ផលិតសាច់ ស៊ុត ឬអ្វីៗគ្រប់បែបយ៉ាងទាំងអស់ ។

 លោកបន្តទៀតថា តើរដ្ឋាភិបាលនៅឯណា? តើមនុស្សទៅណាអស់ហើយ? ពួកគេគួរតែមើលពួកយើង គួរតែអាណិតមនុស្សទាំងអស់នេះ ផ្តល់ធម៌មេត្តាដល់ពួកគេ ។ ពួកយើងរងគ្រោះខ្លាំងណាស់នៅតំបន់ហ្កាហ្សាស្រ្ទីប ហើយនៅតំបន់ភាគខាងជើង ពួកយើងរកទុក្ខវេទនាច្រើនខ្លាំងណាស់ ៕