វិមានក្រឹមឡាំង នៅថ្ងៃពុធ (ទី២៨ ខែសីហា) នេះ បាននិយាយថា អ្នកប្រើប្រាស់តំបន់អ៊ឺរ៉ុប នឹងប្រឈមជាមួយនឹងតម្លៃខ្ពស់ ប្រសិនបើទីក្រុងគីវ មិនយល់ព្រមបន្តកិច្ចព្រមព្រៀងលើការបញ្ជូនឧស្ម័នឆ្លងកាត់របស់រុស្ស៊ីតាមអ៊ុយក្រែន នៅពេលដែលកិច្ចព្រមព្រៀងនោះផុតកំណត់ នៅថ្ងៃទី៣១ ខែធ្នូ។

គួរបញ្ជាក់ថា អ៊ុយក្រែនបានលើកឡើងម្តងហើយម្តងទៀតថា ខ្លួនមិនមានផែនការឲ្យមានកិច្ចព្រមព្រៀងបញ្ជូនឧស្ម័នឆ្លងកាត់ថ្មីជាមួយរុស្ស៊ីនោះទេ ក្នុងពេលជម្លោះយោធាកំពុងបន្តមាន។

អ្នកនាំពាក្យវិមានក្រឹមឡាំង លោក Dmitry Peskov បានប្រាប់អ្នកសារព័ត៌មានក្នុងសន្និសីទប្រចាំថ្ងៃថា ប្រសិនបើទីក្រុងគីវ មិនបន្តកិច្ចព្រមព្រៀងទេនោះ រុស្ស៊ីអាចស្វែងរកផ្លូវផ្សេងជំនួស ដូចជាគ្រោងបង្វែរទៅកាន់មជ្ឈមណ្ឌលឧស្ម័នទួរគីជាដើម។

លោក Peskov បានប្រាប់ថា៖ «មានផ្លូវផ្សេងទៀត ប៉ុន្តែជាការពិតណាស់ ការសម្រេចបែបនេះរបស់ភាគីអ៊ុយក្រែន នឹងធ្វើឲ្យមានការខូចខាតយ៉ាងធ្ងន់ធ្ងរដល់ផលប្រយោជន៍អ្នកប្រើប្រាស់អឺរ៉ុប ពោលគឺអ្នកដែលនៅតែចង់ទិញឧស្ម័នរបស់រុស្ស៊ីដែលទទួលបានការធានាកាន់តែច្រើន និងតម្លៃសមរម្យ»។

ហើយជាមួយគ្នានេះ លោកក៏បាននិយាយដែរថា អឺរ៉ុបនឹងត្រូវចំណាយបន្ថែមទៀត សម្រាប់ការទិញឧស្ម័នពីប្រទេសផ្សេង ក្នុងនោះរួមទាំងឧស្ម័នធម្មជាតិរាវដែលផ្គត់ផ្គង់ដោយសហរដ្ឋអាមេរិកផងដែរ៕