យុវជនប៉ាឡេស្ទីន Diaa al-Adini វ័យ ១៥ឆ្នាំ បានចងចាំការហែលទឹកជាមួយមិត្តភ័ក្តិរបស់គេនៅក្នុងសមុទ្រតំបន់ហ្កាហ្សា មុនពេលដៃទាំងគូរបស់រូបគេ ត្រូវបានកាត់ចោល បន្ទាប់ពីរបួសដោយសារការវាយប្រហាររបស់អ៊ីស្រាអែលកាលពីដើមខែនេះ ហើយរូបគេសង្ឃឹមថាថ្ងៃណាមួយនឹងទទួលបានការព្យាបាលនៅបរទេស ។

ពេលមើលសមុទ្រពីឆ្នេរនៅទីក្រុង Deir al-Balah ជាទីដែលរូបគេទទួលបានការព្យាបាលនៅក្នុងមន្ទីរពេទ្យបណ្តោះអាសន្ន ក្មេងប្រុស Diaa និយាយថា ពួកយើងធ្លាប់ហែលទឹកលេង ហែលទឹកប្រណាំងគ្នាលេង ពួកយើងធ្លាប់លោតចូលទឹក និងដេកលេងនៅទីនោះ ។

នៅថ្ងៃទី ១៣ ខែសីហា ក្មេងប្រុស Diaa អង្គុយក្នុងហាងកាហ្វេ ដើម្បីប្រើប្រាស់អ៊ីនធឺណិត ពេលដែលការវាយប្រហារកើតមានឡើងនៅក្បែរនោះ ។ ក្មេងប្រុស បានរងរបួសជើងដោយសារអំបែងគ្រាប់ និងបានបាត់បង់ដៃទាំងគូ ។

ក្មេងប្រុស Diaa ត្រូវបាននាំទៅកាន់មន្ទីរពេទ្យ Al-Aqsa ជាកន្លែងដែលរូបគេទទួលបានការព្យាបាល រហូតដល់មន្ទីរពេទ្យនោះ ត្រូវបានយោធាអ៊ីស្រាអែលបញ្ជាឲ្យជម្លៀសខ្លួន ទៅតំបន់ជិតខាងនៅទីក្រុង Deir al-Balah ។

ក្មេងប្រុស Diaa និយាយថា រូបគេបានចំណាយពេល ១២ថ្ងៃនៅមន្ទីរពេទ្យ Al-Aqsa ពួកគេបានផ្តល់អ្វីដែលពួកយើងត្រូវការ ហើយការវះកាត់ខ្ញុំក៏បានជោគជ័យ ប៉ុន្តែកាលពីរយៈពេល ២ថ្ងៃមុន ពួកគេនិយាយថា មន្ទីរពេទ្យ Al-Aqsa ត្រូវតែជម្លៀសមនុស្សចេញ ៕