​បាល់ទាត់៖ ក្រុមប្រឹក្សាភិបាល​របស់ FC Barcelona បាន​កំណត់ពេល​ប្រជុំ​បន្ទាន់​មួយ​បន្ទាប់ពី​ក្រុម​រង​បរាជ័យ​ក្រោម​ថ្វីដៃ​របស់​ក្រុម Bayern Munich ។ កិច្ចប្រជុំ​នេះ​រួមមាន​ប្រធាន Joan Laporta អនុប្រធាន Rafa Yuste និង​នាយក​បាល់ទាត់ Mateu Alemany។​ ​ប្រធានបទ​នៃ​ការពិភាក្សាគឺ​ការធ្វើ​មិនបាន​ល្អ​របស់​ក្រុម​ជាថ្មី​ម្តងទៀត​នៅក្នុង​ការប្រកួត​សំខាន់ និង​ទំរង់​មិនល្អ​រដូវ​កាល​ថ្មី​នេះ​។​

​បញ្ហា​ទាំងអស់នេះ​ក៏​មកពី​បញ្ហា​របួស​របស់​ក្រុម​ដែល​រួមមាន Ansu Fati, Sergio Aguero និង Martin Braithwaite សុទ្ធតែ​រងរបួស​។​ ​យោងតាម Mundo Deportivo សមាជិក​ក្រុមប្រឹក្សា​បានសំរេច​ចិត្ត​រក្សា​ទំនុកចិត្ត​លើ​អ្នកចាត់ការ Ronald Koeman ឱ្យ​ដឹកនាំ​ក្រុម​រយៈពេល​យូរ​ទៅមុខទៀត​។ ពួកគេ​បានទទួល​ស្គាល់​ការពិត​ដែលថា ​រដូវ​កាល​នេះ​នៅតែ​ស្ថិតក្នុង​ដំណាក់កាល​ដំបូង ​ហើយ​វា​ឆាប់​ពេក​ក្នុងការ​ប្រញាប់​ធ្វើការ​សម្រេចចិត្ត​ណាមួយ​។​ ​កិច្ចប្រជុំ​ក៏បាន​លើកឡើង​ដែរ​ថា ការសំរេចចិត្ត​ដកតំណែង​លោក Ronald Koeman មិនមែន​ស្ថិតក្នុង​ស្ថានភាព​បែបនេះ​ទេ លុះត្រា​កីឡាករ​មាននៅ​ក្នុង​ដៃ​គ្រប់គ្នា​ដោយ​មិនមាន​បញ្ហា​របួស ហើយ Barcelona ទទួលបាន​លទ្ធផល​មិនល្អ​ទៀត​នោះគឺជា​រឿង​ដែល​ត្រូវ​ពិចារណា​។​

​​Barcelona ចាប់ផ្តើម​រដូវ​កាល​ថ្មី​នៅ​ក្របខណ្ឌ​អេ​ស្ប៉ា​ញ La Liga លេង​បាន ៣ប្រកួត​ឈ្នះ២ និង​ស្មើ១ ខណៈ​នៅ Champions League ចាប់ផ្តើម​នៅ​យប់​ថ្ងៃ​អង្គារ​កន្លងទៅ​ចាញ់ Bayern Munich ៣-០ ក្នុង​ទឹកដី​ខ្លួនឯង​៕

​អត្ថបទ​៖​នាង សុភា​វុ​ធ