នាយករងទីភ្នាក់ងារចារកម្មកណ្ដាល CIA របស់សហរដ្ឋអាមេរិក លោក ដេវីត ខូហេន (David Cohen) បាននិយាយកាលពីថ្ងៃពុធ (២៨ សីហា) ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) នឹងបើកការវាយបកទ្រង់ទ្រាយធំដើម្បីព្យាយាមដណ្តើមយកទឹកដីនៅក្នុងតំបន់ ឃើស (Kursk) ដែលកងទ័ពអ៊ុយក្រែនបានកាន់កាប់យកមកវិញ ប៉ុន្តែកងកម្លាំងរុស្ស៊ី នឹងជួបប្រទះ «ការប្រយុទ្ធដ៏លំបាកមួយ»។

លោក Cohen បានប្រាប់សន្និសីទឧស្សាហកម្មសន្តិសុខជាតិថា សារៈសំខាន់នៃការវាយលុករបស់អ៊ុយក្រែន ដែលបានគ្រប់គ្រងលើផ្ទៃដីប្រហែល ៧៧៧គីឡូម៉ែត្រក្រឡានៃតំបន់ព្រំដែនរុស្ស៊ីនេះ នៅតែត្រូវបានគេមើលឃើញ។ កងកម្លាំងអ៊ុយក្រែន បានវាយទម្លុះឆ្លងកាត់ព្រំដែនភាគខាងលិចរបស់រុស្ស៊ី ចូលទៅក្នុងតំបន់ Kursk កាលពីថ្ងៃទី០៦ ខែសីហា នៅក្នុងការវាយលុកដ៏គួរឱ្យភ្ញាក់ផ្អើលមួយដែលពេលនេះនៅតែបន្ត។

ខណៈដែលទីក្រុងគីវនិយាយថាខ្លួនមិនមានចេតនាក្នុងការដាក់បញ្ចូលតំបន់ដែលបានកាន់កាប់នោះ ទាហានអ៊ុយក្រែនកំពុងសាងសង់ខ្សែការពារ ហើយហាក់ដូចជាបង្ហាញថាពួកគេមានបំណងរក្សា «ទឹកដីមួយចំនួននៃតំបន់នោះមួយរយៈ»។ អ៊ុយក្រែនបានអះអាងពីការដណ្តើមតំបន់តាំងទីលំនៅចំនួន ១០០កន្លែង ក្នុងការលុកលុយរបស់ខ្លួនចូលតំបន់ Kursk របស់រុស្ស៊ី ខណៈកម្លាំងទីក្រុងមូស្គូ បន្តវាយរុលនៅតំបន់ ដូណិតស្ក៍ (Donetsk) ភាគខាងកើត។

កាលពីថ្ងៃអង្គារ ប្រធានាធិបតីអ៊ុយក្រែន លោក វ្ល៉ូឌីមី ហ្សេឡិនស្គី (Volodymyr Zelenskiy) បាននិយាយថា សង្គ្រាមជាមួយរុស្ស៊ីនៅទីបំផុតនឹងបញ្ចប់ដោយការចរចាប៉ុន្តែទីក្រុងគីវត្រូវតែស្ថិតក្នុងជំហររឹងមាំ។ ចំណែកលោក ពូទីន និយាយថា កិច្ចព្រមព្រៀងណាមួយត្រូវចាប់ផ្តើមជាមួយនឹងការទទួលយករបស់អ៊ុយក្រែនចំពោះ «ការពិតនៅលើសមរភូមិ» ដែលមានន័យថារុស្ស៊ី មានសិទ្ធិគ្រប់គ្រងផ្នែកសំខាន់ៗដែលខ្លួនដណ្ដើមបាននៃតំបន់អ៊ុយក្រែនចំនួន៤ រួមទាំងតំបន់គ្រីម៉េ (Crimea)៕