យោធារបស់តៃវ៉ាន់ នឹងវាយតម្លៃការប្រើប្រាស់មីស៊ីលដែលផ្តល់ដោយសហរដ្ឋអាមេរិក បន្ទាប់ពីមានបញ្ហាក្នុងអំឡុងពេលសមយុទ្ធនាពេលថ្មីៗនេះ ដែលមានតិចជាងពាក់កណ្តាលនៃមីស៊ីល បានវាយប្រហារចំគោលដៅ ។

មានមីស៊ីលប្រភេទ TOW ចំនួន ៧គ្រាប់ប៉ុណ្ណោះ ក្នុងចំណោម ១៧ គ្រាប់ដែលបាញ់ចំគោលដៅ។

សមយុទ្ធនេះ ផ្តោតលើការរៀបចំកងទ័ពក្នុងករណីមានការវាយប្រហារណាមួយពីចិន។

យោងតាមការរាយការណ៍ក្នុងស្រុក យោធាតៃវ៉ាន់ កំពុងរៀបចំផែនការប្រជុំដើម្បីវាយតម្លៃឡើងវិញនូវការប្រើប្រាស់មីស៊ីលប្រឆាំងរថក្រោះផលិតដោយសហរដ្ឋអាមេរិកនេះ បន្ទាប់ពីបានមើលឃើញភាពត្រឹមត្រូវរបស់អាវុធមានសមត្ថភាពទាបអំឡុងធ្វើសមយុទ្ធកាលពីដើមសប្តាហ៍នេះ។

សមយុទ្ធនាពេលថ្មីៗនេះ គឺសំដៅលើការហ្វឹកហាត់ឲ្យកងទ័ពចេះពីរបៀបប្រើប្រាស់អាវុធឲ្យស្ទាត់ជំនាញ ដែលអាចត្រូវបានប្រើដើម្បីពង្រឹងការការពាររបស់តៃវ៉ាន់ប្រឆាំងនឹងការវាយលុករបស់ចិន។

កាលពីថ្ងៃពុធ អាជ្ញាធរការពារជាតិរបស់កោះតៃវ៉ាន់ បាននិយាយថា ខ្លួននឹងវាយតម្លៃឡើងវិញនូវការប្រើប្រាស់មីស៊ីល ប្រភេទ TOW បន្ទាប់ពីអាវុធជាច្រើនដែលបានបាញ់ក្នុងអំឡុងពេលហ្វឹកហ្វឺននាពេលថ្មីៗនេះមិនត្រូវចំគោលដៅ។

សមយុទ្ធកាលពីថ្ងៃចន្ទ និងថ្ងៃអង្គារសប្ដាហ៍នេះ ដែលត្រូវបានធ្វើឡើងនៅលើឆ្នេរមួយក្នុងស្រុក ភីង តុង ( Pingtung) ភាគខាងត្បូង ក្បែរច្រកសមុទ្រតៃវ៉ាន់ បានផ្តោតលើការហ្វឹកហ្វឺនរបស់កោះតៃវ៉ាន់ ដើម្បីប្រើប្រាស់មីស៊ីលប្រភេទ TOW នេះ បំណងកំណត់គោលដៅនៅក្នុងសង្រ្គាមពិតប្រាកដមួយទប់ទល់ជលថលិកយានរបស់ចិន៕