បេក្ខជនប្រធានាធិបតីនៃគណបក្សប្រជាធិបតេយ្យ លោកស្រី កាម៉ាឡា ហារីស (Kamala Harris) និងដៃគូរួមដំណែងរបស់ខ្លួនគឺលោក ធីម វ៉លស៍ (Tim Walz) បានចេញធ្វើយុទ្ធនាការរួមគ្នាកាលពីថ្ងៃពុធ (២៨ សីហា) ក្នុងរដ្ឋ ចចា (Georgia) ជារដ្ឋដែលបក្សប្រជាធិបតេយ្យ បានឈ្នះការគាំទ្រយ៉ាងស្ដួចស្ដើងក្នុងឆ្នាំ២០២០ ហើយអាចដើរតួនាទីសំខាន់នៅក្នុងការបោះឆ្នោតនៅឆ្នាំនេះ ដោយដៃគូទាំងពីរស្វះស្វែងរកកាគាំទ្រពីអ្នកបោះឆ្នោតវ័យក្មេង។

លោកស្រី Harris និងលោក Walz បានទៅដល់វិទ្យាល័យមួយក្នុងតំបន់ លីប៊ឺធី ខោនធី (Liberty County) ដោយមានការចូលរួមពីសិស្សានុសិស្សជាច្រើននៅទីនោះ។ ដៃគូបក្សប្រជាធិបតេយ្យទាំងពីររូប កំពុងធ្វើយុទ្ធនាការតាមរថយន្តក្រុងឆ្លងកាត់ភាគខាងត្បូងរដ្ឋ Georgia ដែលមានប្រជាជនស្បែកខ្មៅច្រើនបំផុតរបស់ប្រទេស។ តំបន់ Liberty County មានប្រជាជនប្រហែល ៦៥.០០០នាក់ ដោយ ៤០ភាគរយជាជនជាតិស្បែកខ្មៅ ហើយអ្នកទាំងនោះបានបោះឆ្នោតគាំទ្រលោក Joe Biden យ៉ាងលើសលប់ក្នុងឆ្នាំ២០២០។

ការប្រជែងតំណែងឆ្នាំ២០២៤នេះបានផ្លាស់ប្តូរយ៉ាងខ្លាំងចាប់តាំងពីលោកស្រី Harris បានក្លាយជាបេក្ខជនរបស់បក្ស ហើយលោកស្រីសង្ឃឹមថានឹងទទួលបានការគាំទ្រពីអ្នកបោះឆ្នោតស្បែកខ្មៅនៅរដ្ឋ Georgia ក្នុងកិច្ចខិតខំប្រឹងប្រែងដើម្បីឈ្នះឆ្នោតក្នុងរដ្ឋទាំងមូល។

មុនពេលលោកប្រធានាធិបតី Joe Biden បោះបង់បេក្ខភាពរបស់ខ្លួនកាលពីខែមុន ការស្ទង់មតិបានបង្ហាញថា បេក្ខជនមកពីបក្សសាធារណរដ្ឋ លោក Donald Trump បាននាំមុខដាច់នៅក្នុងរដ្ឋ Georgia នេះហើយថាអ្នកបោះឆ្នោតស្បែកខ្មៅមួយចំនួនមិនពេញចិត្តនឹងសមាជិកបក្សប្រជាធិបតេយ្យទេ៕