ក្រុមអ្នកគាំទ្រគណបក្សកាន់អំណាចរបស់ប្រទេសវេណេស៊ុយអេឡា បានមកប្រមូលផ្តុំគ្នា កាលពីថ្ងៃពុធ ដែលមានរយៈពេលមួយខែ ចាប់តាំងពីការបោះឆ្នោតប្រធានាធិបតីដ៏ចម្រូងចម្រាស់ កាលពីខែកក្កដា ខណៈការចាប់ខ្លួនក្រុមអ្នកប្រឆាំង នៅតែបន្ត។

ក្រុមប្រឹក្សាបោះឆ្នោតរបស់ប្រទេសវេណេស៊ុយអេឡា និងតុលាការកំពូលរបស់ប្រទេស បានប្រកាសថា ប្រធានាធិបតី លោក Nicolas Maduro ដែលឡើងកាន់អំណាចចាប់តាំងពីឆ្នាំ២០១៣ គឺជាអ្នកទទួលជ័យជម្នះក្នុងការបោះឆ្នោតកាលពីថ្ងៃទី ២៨ ខែកក្កដា ប៉ុន្តែចំនួនសរុបនៃសន្លឹកឆ្នោតពេញលេញ នៅពុំទាន់ត្រូវបានផ្សព្វផ្សាយនៅឡើយ។ គណបក្សប្រឆាំងរបស់ប្រទេសវេណេស៊ុយអេឡា បានផ្សព្វផ្សាយចំនួនសន្លឹកឆ្នោតសរុបរបស់ខ្លួនដែលបង្ហាញពីជ័យជម្នះភ្លូកទឹកភ្លូកដី សម្រាប់បេក្ខជនរបស់ខ្លួន លោក Edmundo Gonzalez។

បន្ទាប់ពីការហែក្បួនបាតុកម្ម លោក Maduro បានឡើងលើវេទិកា នៅខាងក្រៅវិមានរដ្ឋាភិបាល Miraflores ដោយហៅអតីតបេក្ខជនគណបក្សប្រឆាំង លោក Edmundo Gonzalez ថាជា «មនុស្សកំសាក» និងបានអំពាវនាវឱ្យពិភពលោក «គោរពដែនអធិបតេយ្យភាព និងជីវិតផ្ទៃក្នុងរបស់ប្រទេសវេណេស៊ុយអេឡា»។

ក្រុមប្រឹក្សារៀបចំការបោះឆ្នោត និយាយថា ខ្លួនពុំទាន់បានបញ្ចេញចំនួនសរុបលម្អិតនៃអ្វីដែលខ្លួននិយាយថា ជាជ័យជម្នះរបស់លោក Maduro ដោយមានសំឡេងជាងពាក់កណ្តាលនៃសន្លឹកឆ្នោត នៅឡើយ ដោយសារតែការវាយប្រហារតាមអ៊ីនធឺណិត បានធ្វើឲ្យប៉ះពាល់ដល់ប្រព័ន្ធរបស់ខ្លួន។

ការខ្វែងគំនិតគ្នានេះ បានជំរុញឱ្យមានការអំពាវនាវជាអន្តរជាតិឱ្យបញ្ចេញលទ្ធផលពេញលេញ និងបានបង្កឲ្យមានការតវ៉ាដ៏បង្ហូរឈាម និងចំណាត់ការដោយអាជ្ញាធរដើម្បីចាប់ខ្លួនក្រុមអ្នកប្រឆាំង និងអ្នកសារព័ត៌មាន។