ប្រធានាធិបតីអ៊ុយក្រែន លោក Volodymyr Zelensky បាននិយាយ កាលពីថ្ងៃពុធថា ទាហានអ៊ុយក្រែន បានកាន់កាប់តំបន់ជាច្រើនបន្ថែមទៀតនៅក្នុងតំបន់ Kursk របស់រុស្ស៊ី ដោយមេបញ្ជាការ លោកOleksandr Syrskyi បានរាយការណ៍អំពីប្រតិបត្តិការនៅក្នុងតំបន់ Kursk។

លោក Zelenskiy បាននិយាយនៅក្នុងសុន្ទរកថា តាមវីដេអូប្រចាំថ្ងៃរបស់លោក កាលពីថ្ងៃល្ងាចថ្ងៃពុធថា យើង បន្តពង្រីកដែនដីឲ្យនៅក្រោមការគ្រប់គ្រងរបស់យើងនៅក្នុងតំបន់ដែលបានកំណត់នៅជិតព្រំដែនប្រទេសអ៊ុយក្រែន។

កងកម្លាំងប្រដាប់អាវុធអ៊ុយក្រែន បានចូលលុកលុយនៅតំបន់ Kursk របស់រុស្ស៊ី កាលពីថ្ងៃទី៦ ខែសីហា។ លោក Zelenskiy និយាយនៅក្នុងសុន្ទរកថារបស់លោកថា យើងត្រូវតែយល់ផងដែរនៅពេលបច្ចុប្បន្ននេះថា សម្ពាធទាំងអស់ដែលយើងបានផ្ទេរទៅឲ្យរុស្ស៊ី មានន័យថាពួកគេ មិនអាចដាក់សម្ពាធបន្ថែមទៀតទៅលើតំបន់ Donetsk របស់យើងបានទេ។

ទោះជាយ៉ាងណា លោក Zelenskiy ក៏បានកត់សម្គាល់ផងដែរថា ស្ថានភាពនៅក្រុង Pokrovsk និងទិសដៅផ្សេងទៀតនៅក្នុងតំបន់ Donetsk គឺពិបាកខ្លាំង។

លោក និយាយថា កិច្ចខិតខំប្រឹងប្រែងសំខាន់ៗរបស់រុស្ស៊ី និងកងកម្លាំងច្រើនបំផុតរបស់ពួកគេ បានប្រមូលផ្តុំនៅទីនោះ ហើយភាពធន់នៃអង្គភាពរបស់យើងនីមួយៗ សមត្ថភាពរបស់យើង ដើម្បីបំផ្លាញអ្នកចូលកាន់កាប់ ពេលនេះមានសារៈសំខាន់ខ្លាំង។