លោកប្រធានាធិបតីបារាំង Emmanuel Macron បានប្រកាសការបើកព្រឹត្តិការណ៍កីឡាអូឡាំពិកជនមានពិការភាព រឺកីឡាប៉ារ៉ាឡាំពិក Paralympic Games Paris 2024 កាលពីថ្ងៃពុធទី២៨សីហាសប្ដាហ៍នេះ បន្ទាប់ពីពិធីដ៏មហាឡោរិក ក្រោមវត្តមានក្រុមអ្នកគាំទ្រ ក្រុមការងារស្ម័គ្រចិត្ត និងប្រតិភូចូលរួម ក្នុងរាត្រីដ៏សែនរីករាយចំពោះអត្តពលិកជនពិការមកពីទូទាំងពិភពលោក។

ពិធីបើកនៅអគារ ហ្ស៊ុនអេលីហ្សេ (Champs Elysees) និងទីលានចតុរង្គផ្លាស ឌើ ឡា កុងកដើស (Place de la Concorde) បានក្លាយជាពិធីបើកកីឡាប៉ារ៉ាឡាំពិកដំបូងគេដែលត្រូវបានធ្វើឡើងនៅខាងក្រៅកីឡដ្ឋាន ដោយមានបាញ់កាំជ្រួចភ្ញី និងការប្រគំតន្ត្រីយ៉ាងអធិកអធម។

មានការរឹតបន្តឹងសន្តិសុខតឹងតែង ដើម្បីធានាសុវត្ថិភាព ខណៈបារាំង បានពង្រាយកងកម្លាំងប្រហែល ១៥.០០០ នាក់នៅក្នុងព្រឹត្តិការណ៍នោះ ។

កម្មវិធីផ្សាយផ្ទាល់ បានចាប់ផ្តើមនៅទីលានចតុរង្គផ្លាស ឌើ ឡា កុងកដើស អមដោយក្រុមតន្ត្រីករជនជាតិកាណាដា ជាអ្នកនិពន្ធបទចម្រៀងនិងជាផលិតករ ផ្នែកព្យាណូ លោកឈីលីហ្គុនហ្សាឡេស(Chilly Gonzales)។

គួរបញ្ជាក់ថា ព្រឹត្តិការណ៍កីឡាអូឡាំពិកជនពិការ រឺហៅថា ប៉ារ៉ាឡាំពិកដែលរៀបចំនៅទីក្រុងប៉ារីសប្រទេសបារាំងឆ្នាំនេះ មានអត្តពលិកចូលរួមសរុប ៤៤០០ នាក់មកពីជុំវិញពិភពលោក ប្រកួតប្រជែងលើ ៥៤៩ វិញ្ញាសា នៃ ២២ ប្រភេទកីឡា។

សូមរំម្លឹកថា ព្រឹត្តិការណ៍បើកការប្រកួតកីឡាអូឡាំពិកកាលពីខែមុន ត្រូវបានរៀបចំឡើងទាំងភ្លៀងធ្លាក់ខ្លាំង ដែលរំខានដល់ការហាត់សមកីឡាទ្រីអាត្លុងផ្នែកហែលទឹកនៅក្នុងស្ទឹងសែន៕