អ្នកនាំពាក្យក្រុម ហ៊ូទី នៅប្រទេសយេម៉ែន លោក Mohammed Abdulsalam បាននិយាយ កាលពីល្ងាចថ្ងៃពុធថា ក្រុមនេះ បានយល់ព្រមអនុញ្ញាតឱ្យមានប្រតិបត្តិការជួយសង្គ្រោះ និងសណ្តោងនាវាដឹកប្រេងដែលឆេះ នៅសមុទ្រក្រហម។

លោក Abdulsalam ដែលមានមូលដ្ឋាននៅប្រទេសអូម៉ង់ ត្រូវបានដកស្រង់សម្តីដោយទូរទស្សន៍ al-Masirah របស់ក្រុមហ៊ូទី ដោយបាននិយាយថា ការសម្រេចចិត្តនេះ ត្រូវបានធ្វើឡើង បន្ទាប់ពីការចរចាជាមួយឯកអគ្គរដ្ឋទូតសហភាពអឺរ៉ុប នៅទីក្រុង Muscat ប្រទេសអូម៉ង់។

យោងតាមទូរទស្សន៍របស់ក្រុមហ៊ូទី បានរាយការណ៍ថា អណ្តាតភ្លើងបានឆាបឆេះហ៊ុមព័ទ្ធនាវា រយៈពេលច្រើនថ្ងៃក្នុងពេលមានការលេចធ្លាយប្រេងឆៅ ហើយនាវានឹងត្រូវបានអូសសណ្តោងទៅកាន់កំពង់ផែមួយកន្លែងក្នុងប្រទេសអេរីទ្រា ។ នាវានេះ ត្រូវបានកំណត់អត្តសញ្ញាណថាជានាវា អ៊ឹមវី ស៊ូនៀន(MV SOUNION) ដឹកប្រេងឆៅទម្ងន់ ១៥០.០០០តោន បានឆាបឆេះចាប់តាំងពីថ្ងៃទី២៣ ខែសីហា បន្ទាប់ពីនាវា ត្រូវបានវាយប្រហារម្តងហើយម្តងទៀតនៅជិតទីក្រុងកំពង់ផែ Hodeidah ប្រទេសយេម៉ែន គ្រប់គ្រងដោយក្រុមហ៊ូធី។ ក្រុមហ៊ូទី បានអះអាងទទួលខុសត្រូវចំពោះការវាយប្រហារលើនាវានេះ។

យោងតាមសេចក្តីថ្លែងការណ៍របស់ហ៊ូទី បាននិយាយថា ការវាយប្រហារត្រូវបានធ្វើឡើងដោយទូកជាច្រើនគ្រឿង មីស៊ីលបាលីស្ទីក មីស៊ីលតម្រង់គោលដៅគ្មានយានជំរុញ និងយានដ្រូន។

ចាប់តាំងពីខែវិច្ឆិកា ឆ្នាំ២០២៣មក ក្រុមហ៊ូទី បានកំណត់គោលដៅលើអ្វីដែលពួកគេហៅថា នាវាដឹកទំនិញមានទំនាក់ទំនងជាមួយអ៊ីស្រាអែល នៅសមុទ្រក្រហម និងឈូងសមុទ្រ Aden ដើម្បីបង្ហាញពីសាមគ្គីភាពជាមួយពលរដ្ឋប៉ាឡេស្ទីន នៅតំបន់ហ្កាហ្សា។