ស្ថានទូតចិនប្រចាំនៅហ្វីលីពីន បាននិយាយក្នុងថ្ងៃព្រហស្បតិ៍ (២៩ សីហា) នេះថា ខ្លួនបានចេញការតវ៉ាការទូតទៅកាន់ស្ថានទូតជប៉ុនប្រចាំហ្វីលីពីន ជុំវិញអ្វីដែលខ្លួនហៅថា «ការលើកឡើងមិនទទួលខុសត្រូវ» របស់ឯកអគ្គរដ្ឋទូតជប៉ុន ជុំវិញឧប្បត្តិហេតុប៉ះទង្គិចគ្នារវាងចិន និងហ្វីលីពីន កាលពីពេលថ្មីៗនេះនៅដែនទឹក សៀនពិន ចែវ (Xianbin Jiao) ឬត្រូវបានគេស្គាល់ថាដែនទឹក សាប៊ីណា ស្ហូល (Sabina Shoal) នៅសមុទ្រចិនខាងត្បូង។

នៅក្នុងសេចក្តីថ្លែងការណ៍មួយ ស្ថានទូតចិនបាននិយាយថា ការអត្ថាធិប្បាយនោះបានបង្ហាញពី «ការមិនអើពើនឹងការពិត និងចោទប្រកាន់ដោយគ្មានហេតុផលប្រឆាំងនឹងចិន» បន្ទាប់ពីឯកអគ្គរដ្ឋទូតជប៉ុនកាលពីថ្ងៃចន្ទ បានបង្ហោះវីដេអូនាវាឆ្មាំល្បាតឆ្នេរចិន ដោយសរសេរថា «សកម្មភាពដែលមិនអាចទទួលយកបានមួយផ្សេងទៀតនៅជុំវិញដែនទឹក Sabina Shoal»។

អ្នកនាំពាក្យចិនសង្កត់ធ្ងន់ថា សន្តិភាព និងស្ថិរភាពនៃតំបន់អាស៊ីប៉ាស៊ីហ្វិកគឺពិបាករកបានណាស់ ហើយចាំបាច់ត្រូវមានការយកចិត្តទុកដាក់ និងការពារពីបណ្តាប្រទេសក្នុងតំបន់។ អ្នកនាំពាក្យរូបនេះបន្តថា ចិនការពារយ៉ាងម៉ឺងម៉ាត់នូវអធិបតេយ្យភាពទឹកដី និងសិទ្ធិ និងផលប្រយោជន៍ដែនសមុទ្ររបស់ខ្លួន ហើយនៅតែប្តេជ្ញាចិត្តក្នុងការដោះស្រាយជម្លោះដែនសមុទ្រឱ្យបានត្រឹមត្រូវជាមួយហ្វីលីពីន តាមរយៈការសន្ទនា និងការពិគ្រោះយោបល់។

អ្នកនាំពាក្យក៏បានជំរុញឱ្យជប៉ុន ឆ្លុះបញ្ចាំងឱ្យស៊ីជម្រៅអំពីប្រវត្តិសាស្ត្រ ឆ្លុះបញ្ចាំងពីពាក្យសម្តី និងសកម្មភាពរបស់ខ្លួន និងរួមចំណែកបន្ថែមទៀតដល់សន្តិភាព និងស្ថិរភាពក្នុងតំបន់ ហើយព្យាយាមបង្កើតខ្លួនជាប្រទេសឯករាជ្យ និងគួរឱ្យទុកចិត្តពិតប្រាកដនៅក្នុងក្រសែភ្នែកអ្នកជិតខាងអាស៊ី និងសហគមន៍អន្តរជាតិ៕