រដ្ឋមន្ត្រីការបរទេសកូរ៉េខាងត្បូង លោក ចូ ជេ យូល (Cho Tae-yul) កាលពីថ្ងៃពុធ បានសម្តែងការព្រួយបារម្ភជុំវិញច្បាប់ថ្មីមួយដែលទើបចេញដោយក្រុមតាលីបង់ នៅក្នុងប្រទេសអាហ្វហ្គានីស្ថាន និងបានអំពាវនាវឲ្យអាជ្ញាធរគោរពសិទ្ធិមនុស្ស។

ដោយបានចេញផ្សាយដោយក្រសួងយុត្តិធម៌របស់តាលីបង់កាលពីសប្តាហ៍មុន ច្បាប់ដែលមានចំនួន ៣៥  មាត្រា បានបង្កឲ្យមានការរិះគន់ពីអន្តរជាតិចំពោះការរឹតត្បិតសិទ្ធិស្ត្រី ដោយសារតែខចែងខ្លះ ដែលតម្រូវឲ្យ ស្ត្រីបិទមុខ និងដងខ្លួននៅខាងក្រៅផ្ទះរបស់ពួកគេ ហើយហាមឃាត់ពួកគេមិនឲ្យនិយាយជាសាធារណៈ។

ច្បាប់នេះ ក៏រួមបញ្ចូលទាំងច្បាប់ស្តីពីការស្លៀកពាក់របស់បុរស និងហាមមិនឲ្យស្រឡាញ់ភេទដូចគ្នា និង ប្រគុំតន្រ្តីនៅតាមទីសាធារណៈ។

លោក ចូ បានសរសេរនៅលើគេហទំព័រ X ថា៖ «យើងមានការព្រួយបារម្ភ និងខកចិត្តយ៉ាងខ្លាំងចំពោះអ្វីដែលហៅថា ច្បាប់សីលធម៌របស់ប្រទេសអាហ្វហ្គានីស្ថាន។

«សិទ្ធិស្ត្រី និងសេចក្តីថ្លៃថ្នូររបស់មនុស្ស គឺពិតជាសំខាន់ណាស់សម្រាប់ការរីកចម្រើនរបស់ប្រទេសមួយ។ យើងជំរុញឲ្យ ក្រុមតាលីបង់យកចិត្តទុកដាក់លើការព្រួយបារម្ភជាសកល និងគោរពសិទ្ធិមនុស្ស និងសេរីភាពជាមូលដ្ឋាន»។