រដ្ឋមន្ត្រីការបរទេសអ៊ុយក្រែន បាននិយាយកាលពីថ្ងៃពុធថា៖«បញ្ហាធំបំផុត» ដែលទីក្រុងគីវ កំពុងប្រឈមមុខគឺថា សម្ព័ន្ធមិត្តមានការស្ទាក់ស្ទើរក្នុងការអនុម័តគោលនយោបាយថ្មី ដើម្បីគាំទ្រខ្លួន ដោយសារពួកគេ ភ័យខ្លាចថា វានឹងនាំឲ្យមានការកើនឡើងភាពតានតឹង នៅក្នុងសង្គ្រាម ជាមួយរុស្ស៊ី។

លោក Dmytro Kuleba បាននិយាយនៅក្នុងកិច្ចប្រជុំមួយនៅទីក្រុង Olsztyn របស់ប្រទេសប៉ូឡូញដែលដឹកនាំដោយសមភាគីរបស់ខ្លួន លោក Radoslaw Sikorski ថា៖«ចាប់តាំងពីការចាប់ផ្តើមនៃការលុកលុយទ្រង់ទ្រាយធំ (ដោយរុស្ស៊ី) បញ្ហាដ៏ធំបំផុតដែលអ៊ុយក្រែន កំពុងប្រឈមមុខ គឺការគ្រប់គ្រងទៅលើគោលគំនិតនៃការកើនឡើងភាពតានតឹង នៅក្នុងដំណើរការធ្វើការសម្រេចចិត្ត ក្នុងចំណោមដៃគូរបស់យើង» ។

លោក Kuleba បាននិយាយថា «រាល់សំណើ» ដែលធ្វើឡើងដោយអ៊ុយក្រែនសម្រាប់ការផ្តល់អាវុធប្រភេទថ្មី ត្រូវបានច្រានចោល ដោយសារតែគំនិតដែលថា ការធ្វើបែបនេះ អាចជំរុញឲ្យរុស្ស៊ីបង្កើនជម្លោះបន្ថែមទៀត។

លោកបានបញ្ជាក់ដែរថា អ៊ុយក្រែន អាចស្ថិតក្នុងជំហររឹងមាំជាងសព្វថ្ងៃនេះ «ប្រសិនបើការភ័យខ្លាចនៃការកើនឡើងភាពតានតឹង មិនមែនជាកត្តាសម្រេចចិត្តដ៏សំខាន់ក្នុងចំណោមដៃគូរបស់យើងនោះ»។