​បាល់ទាត់៖ ​ការប្រកួត​ក្របខណ្ឌ​ក្លិប​កំពូល​អាស៊ី AFC Champions League រកបាន​ក្រុម​គ្រប់​ចំនួន​ហើយ​ឡើង​វគ្គ ៨​ក្រុម​ចុងក្រោយ​ដែលមាន ៤​ក្រុម​នៅ​តំបន់​អាស៊ី​ខាងលិច និង​ ៤ក្រុម​នៅ​តំបន់​អាស៊ី​ខាងកើត​។

​​ពីរ​គូប្រកួត​នៅ​ថ្ងៃ​ពុធ​ម្សិលមិញ ក្រុម​ជើងឯក​ពីរ​សម័យ​របស់​កូរ៉េខាងត្បូង Jeonbuk Motors បាន​កក់​កៅអី​នៅ​វគ្គ ៨ក្រុម​ចុងក្រោយ​បន្ទាប់ពី​ជ័យជំនះ​លើ​ក្រុម​ថៃ BG Pathum United ដោយ​បាល់ ១១ម៉ែត្រ​កាត់សេចក្តី​។ ​​ក្រុម​ម្ចាស់ផ្ទះ​កូរ៉េ​បាន​បើក​ការនាំ​មុខមុន​នៅ​ចុង​វគ្គ​ទី១ នាទី​ទី៤៥+២ ដោយ Gustavo Sousa មុន​ពេលដែល​ខ្សែប្រយុទ្ធ​វ័យ ៣៣ឆ្នាំ​ថៃ Teerasil Dangda គឺជា​អ្នក​រកបាន​គ្រាប់​តាម​ស្មើ​នៅ​នាទី​ទី៧៦​។ ​​មិនមាន​ប្រែប្រួល​គ្រាប់​បាល់​ទៀតឡើយ ការប្រកួត​ក៏​អូសបន្លាយ​ដល់​វគ្គ ១១ម៉ែត្រ​កាត់សេចក្តី​ពោលគឺ Jeonbuk បាន​យកឈ្នះ​ក្នុង​លទ្ធផល ៤-២ បន្ទាប់ពី​កីឡាករ​របស់ BG Pathum ពីរ​នាក់​ស៊ុត​មិន​ចូល​រួមមាន Sarach Yooyen និង Chitchanok សង្គ្រោះបាន​ដោយ​អ្នកចាំទី Jeonbuk, Song Bum-keun​។​

​​ងាក​មក​ការប្រកួត​មួយគូ​ទៀត​នៅ​ថ្ងៃ​ពុធ​ម្សិលមិញ​ដែរ ក្រុម​ជើងឯក​បី​សម័យ​របស់​កូរ៉េខាងត្បូង​មួយទៀត​គឺ Pohang Steelers ក៏បាន​ឈានឡើង​វគ្គ ៨ក្រុម​ចុងក្រោយ​ដែរ​បន្ទាប់ពី​ជ័យ​ជំនះ ១-០ នៅ​ទឹកដី​ជប៉ុន​របស់ Cerezo Osaka​។ គ្រាប់​បាល់​ជ័យជំនះ​របស់ Pohang Steelers ធ្វើបាន​ដោយ Lee Seung-mo នៅ​នាទី​ទី២៥​។ ​ដូច្នេះ ​៤​ក្រុម​នៅ​តំបន់​អាស៊ី​ខាងកើត​នេះ​មាន​ក្រុម​មកពី​កូរ៉េខាងត្បូង​ដល់​ទៅ ៣ រួមមាន Pohang Steelers, Jeonbuk Motors និង Ulsan Hyundai ខណៈ​ជប៉ុន​នៅសល់​មួយក្រុម​គឺ Nagoya Grampus​។​ ​ចំណែក​នៅ​តំបន់​អាស៊ី​ខាង​លិច ៤ ដែល​ឡើង​មាន​ពីរ​ក្រុម​មកពី​អារ៉ាប៊ីសាអ៊ូឌីត​គឺ Al-Hilal និង Al-Nassr ខណៈ អារ៉ាប់​រួមមាន​មួយក្រុម​គឺ Al Wahda និង​អ៊ីរ៉ង់​មួយក្រុម​គឺ Persepolis​។ ការចាប់​ឆ្នោត​បែងចែក​គូប្រកួត​នឹងធ្វើ​ឡើង​នៅ​ថ្ងៃទី១៧ ខែកញ្ញា​ស្អែក​នេះ ខណៈ​ការប្រកួត​តំបន់​អាស៊ី​ខាងលិច​ចាប់ផ្តើម​នៅ​ថ្ងៃទី១៦ ខែតុលា ឯ​អាស៊ី​ខាងកើត​ថ្ងៃទី១៧ ខែតុលា​៕

​អត្ថបទ​៖​នាង សុភា​វុ​ធ