ទីភ្នាក់ងារស៊ើបអង្កេតយោធាកូរ៉េខាងត្បូង កាលពីថ្ងៃពុធ (ទី២៨ ខែសីហា) បានប្រាប់ថា ភ្នាក់ងារស៊ើបការណ៍យោធាកូរ៉េខាងត្បូងម្នាក់ត្រូវបានចោទប្រកាន់ពីបទប្រគល់ព័ត៌មានសម្ងាត់ឲ្យទៅភ្នាក់ងារចិនជាថ្នូរនឹងប្រាក់ អស់រយៈពេលប្រហែល ៧ឆ្នាំ។

រដ្ឋអាជ្ញាយោធា បាននិយាយថា ភ្នាក់ងារដែលធ្វើការជាមួយទីបញ្ជាការស៊ើបការណ៍សម្ងាត់ការពារប្រទេសកូរ៉េ ត្រូវបានចោទប្រកាន់កាលពីថ្ងៃទី២៧ ខែសីហា ពីបទធ្វើឲ្យបែកធ្លាយព័ត៌មានសម្ងាត់ដល់ភ្នាក់ងារស៊ើបការណ៍សម្ងាត់ចិនដែលរូបគេបានទាក់ទងជាលើកដំបូងក្នុងឆ្នាំ២០១៧។

បើយោងតាមរដ្ឋអាជ្ញា បានឲ្យដឹងថា អស់រយៈពេលជាង ៧ឆ្នាំមកនេះ រូបគេទំនងជាទទួលបានប្រាក់ជាង ១០លានវ៉ុន (ប្រមាណជាង ៧.០០០ដុល្លារ) ពីភ្នាក់ងារចិន ជាថ្នូរនឹងការប្រគល់នូវព័ត៌មានសម្ងាត់។ រដ្ឋអាជ្ញាបាននិយាយថា រូបគេប្រើមុខងារស្ងាត់សំឡេង ដើម្បីថតរូប និងស្គ្រីនសត (ថតលើអេក្រង់) ដោយគ្មានសំឡេងរំខាន ដើម្បីថតព័ត៌មានសម្ងាត់។

ដើម្បីគេចពីការត្រួតពិនិត្យ រូបគេបានបង្កើតគណនីជាច្រើន ដែលគណនីនីមួយៗមានពាក្យសម្ងាត់ខុសៗគ្នា ហើយប្រើការជជែកជាសំឡេងជាជាងផ្ញើសារ នៅលើកម្មវិធីផ្ញើសាររបស់ប្រទេសចិន ដូចជា WeChat ជាដើម ដើម្បីទំនាក់ទំនង។ 

តែយ៉ាងណាក្ដី រដ្ឋអាជ្ញាយោធាបាននិយាយថា ខណៈដែលអាថ៌កំបាំងត្រូវបានគេជឿថា បានលេចធ្លាយដល់ប្រទេសចិន មិនមែនកូរ៉េខាងជើងនោះ ពួកគេមិនអាចធ្វើការចោទប្រកាន់ចារកម្មប្រឆាំងនឹងភ្នាក់ងារនេះបានឡើយ។ ក្រោមច្បាប់បច្ចុប្បន្ន នៅកូរ៉េខាងត្បូង សកម្មភាពចារកម្មដែលប្រព្រឹត្តដោយប្រទេសផ្សេងក្រៅពីកូរ៉េខាងជើង មិនអាចត្រូវបានដាក់ទណ្ឌកម្មទេ។ តំណាងអយ្យការបាននិយាយថា ជំនួសមកវិញ ភ្នាក់ងារនេះត្រូវបានចោទប្រកាន់ពីបទទទួលសំណូក និងច្បាប់ផ្សេងទៀត ស្តីពីការការពារព័ត៌មានសម្ងាត់យោធា៕