ប្រទេសហុងឌូរ៉ាស កាលពីថ្ងៃពុធ (ទី២៨ ខែសីហា) បាននិយាយថា ខ្លួនកំពុងបញ្ចប់សន្ធិសញ្ញាបត្យាប័នជាមួយសហរដ្ឋអាមេរិក ដែលត្រូវបានប្រើ ដើម្បីដាក់ពន្ធនាគារអ្នកជួញដូរគ្រឿងញៀន ដោយចោទប្រកាន់ទីក្រុងវ៉ាស៊ីនតោនថា បានជ្រៀតជ្រែកក្នុងទំនាក់ទំនងហុងឌូរ៉ាស-វេណេហ្ស៊ុយអេឡា។

នៅលើវេទិកាបណ្ដាញសង្គម X របស់ខ្លួន ប្រធានាធិបតី លោកស្រី Xiomara Castro បានលើកឡើងថា៖ «ការជ្រៀតជ្រែក និងអន្តរាគមន៍របស់សហរដ្ឋអាមេរិក ក៏ដូចជាចេតនារបស់ខ្លួន ក្នុងការគ្រប់គ្រងនយោបាយនៃប្រទេសហុងឌូរ៉ាស តាមរយៈស្ថានទូត និងអ្នកតំណាងផ្សេងទៀត គឺមិនអាចអត់ឱនឲ្យបានទេ»។ លោកស្រីបានបន្ថែមថា លោកស្រីបានបញ្ជាឲ្យរដ្ឋមន្ត្រីការបរទេសបញ្ចប់សន្ធិសញ្ញា។

មេដឹកនាំឆ្វេងនិយមរូបនេះ បានប្រាប់ថា៖ «ពួកគេវាយប្រហារ ធ្វើមិនដឹងមិនឮ និងបំពានដោយនិទណ្ឌភាព ចំពោះគោលការណ៍ និងការអនុវត្តច្បាប់អន្តរជាតិ ដែលលើកកម្ពស់ការគោរពអធិបតេយ្យភាព និងការប្តេជ្ញាចិត្តដោយខ្លួនឯងរបស់ប្រជាជន ការមិនជ្រៀតជ្រែក និងសន្តិភាពសកល។ គ្រប់គ្រាន់ហើយ»។

រដ្ឋាភិបាលរបស់លោកស្រី Castro គឺជាសម្ព័ន្ធមិត្តដ៏រឹងមាំរបស់វេណេហ្ស៊ុយអេឡា ដែលបច្ចុប្បន្នស្ថិតនៅក្រោមសម្ពាធពីទីក្រុងវ៉ាស៊ីនតោន និងប្រទេសដទៃទៀត បន្ទាប់ពីមាននូវការជាប់ឆ្នោតឡើងវិញដ៏ចម្រូងចម្រាសរបស់ប្រធានាធិបតី លោក Nicolas Maduro។

គួរបញ្ជាក់ថា បើយោងទៅតាមអាជ្ញាធរអាមេរិក បានឲ្យដឹងថា កិច្ចព្រមព្រៀងធ្វើបត្យាប័នត្រូវបានចាត់ទុកថា ជាមធ្យោបាយដ៏សំខាន់មួយ ដើម្បីបំផ្លាញ «រដ្ឋគ្រឿងញៀន» ដែលត្រូវបានបង្កើតឡើង នៅក្នុងប្រទេសហុងឌូរ៉ាស នៅពេលលោក Juan Orlando Hernandez ជាប្រធានាធិបតីពីឆ្នាំ២០១៤ ដល់ឆ្នាំ២០២២៕