ចៅក្រម នៅថ្ងៃព្រហស្បតិ៍ (ទី២៩ ខែសីហា) បានប្រាប់ឲ្យដឹងថា នាយកប្រតិបត្តិក្រុមហ៊ុនផលិតថ្មលីចូមរបស់កូរ៉េខាងត្បូងដែលរោងចក្ររបស់ខ្លួនត្រូវបានអគ្គិភ័យឆាបឆេះ រហូតបណ្ដាលឲ្យមានមនុស្សស្លាប់ ២៣នាក់ កាលខែមិថុនា ត្រូវបានចាប់ខ្លួន បន្ទាប់ពីតុលាការបានអនុម័តដីកា ជុំវិញការចោទប្រកាន់ពីបទរំលោភលើច្បាប់សុវត្ថិភាពឧស្សាហកម្ម។

លោក Park Soon-kwan នាយកប្រតិបត្តិរបស់ក្រុមហ៊ុនផលិតថ្ម Aricell ដែលគ្រប់គ្រងហ៊ុនភាគច្រើនដោយក្រុមហ៊ុន S-Connect បានសុំអភ័យទោសបន្ទាប់ពីមានអគ្គិភ័យនោះ ប៉ុន្តែនៅពេលនោះ បាននិយាយថា ក្រុមហ៊ុនបានអនុវត្តតាមការតម្រូវឲ្យមានការប្រុងប្រយ័ត្ន និងការបណ្តុះបណ្តាលសុវត្ថិភាពគ្រប់យ៉ាងទាំងអស់ សម្រាប់បុគ្គលិក។

ចៅក្រមកិច្ចការសាធារណៈ បានប្រាប់ឲ្យដឹងតាមទូរសព្ទថា តុលាការតំបន់ Suwon ដែលមានយុត្តាធិការ ចំពោះទីក្រុង Hwaseong ពោលគឺជាមូលដ្ឋានរបស់រោងចក្រនោះ បានអនុម័តដីកាឃុំខ្លួនលោក Park កាលពីល្ងាចថ្ងៃពុធ (ទី២៨ ខែសីហា) ដោយសារមានការចោទប្រកាន់កម្រិតធ្ងន់ធ្ងរលើរូបលោក។

ជាមួយគ្នានេះ ចៅក្រមរូបនោះបានបន្ថែមថា តុលាការក៏បានអនុម័តផងដែរ ចំពោះដីកាឃុំខ្លួនលើកូនប្រុសរបស់លោក Park ដែលជាអ្នកកាន់ការនៅក្រុមហ៊ុននេះ។ មេធាវីរបស់លោក Park មិនអាចទាក់ទងបានភ្លាមៗនោះឡើយ ដើម្បីសុំការអត្ថាធិប្បាយ៕

រូបភាពវីដេអូ តាមកញ្ចក់ទូរទស្សន៍ បានបង្ហាញឲ្យឃើញថា អំឡុងពេលដើរចូលក្នុងតុលាការ ដើម្បីចូលរួមសវនាការ កាលពីថ្ងៃពុធនោះ លោក Park មិនបានឆ្លើយតបនឹងសំណួររបស់អ្នកសារព័ត៌មាននោះទេ ជុំវិញការចោទប្រកាន់លើរូបលោក ប៉ុន្តែបាននិយាយថា៖ «ខ្ញុំសោកស្ដាយណាស់»៕