គណនី Meet «Eva» «Sophia» និង «Samantha» ជាគណនីក្លែងក្លាយដែលក្លែងធ្វើជាស្ត្រីជនជាតិអាមេរិកឆើតឆាយទាន់សម័យគាំទ្រលោក Donald Trump នៅលើវេទិការបស់បណ្ដាញសង្គម X ដោយបន្លំខ្លួនដោយការប្រើប្រាស់រូបថតខុសច្បាប់របស់តារាបង្ហាញម៉ូត និងអ្នកមានឥទ្ធិពលមានរូបសម្រស់ស្រស់ស្អាត នៅអឺរ៉ុប។ នេះបើយោងតាមការសិក្សាដែលបានចេញផ្សាយ កាលពីថ្ងៃពុធ (ទី២៨ ខែសីហា)។

របាយការណ៍របស់មជ្ឈមណ្ឌលមិនរកប្រាក់ចំណេញ សម្រាប់ភាពធន់នឹងព័ត៌មាន (CIR) កើតមានឡើងក្នុងខណៈពេលដែលមុនការបោះឆ្នោត នៅសហរដ្ឋអាមេរិក ក្នុងខែវិច្ឆិកា អ្នកស្រាវជ្រាវបង្ហាញការជូនដំណឹងថា គេហទំព័រគ្រប់គ្រងដោយលោក Elon Musk ដែលបានគាំទ្រ Trump កំពុងញាំញីដោយគណនីក្លែងក្លាយ និងព័ត៌មានមិនពិតផ្នែកនយោបាយ។

CIR បានឲ្យដឹងថា ខ្លួនបានរកឃើញគណនីចំនួន ១៦ ដែលប្រើប្រាស់រូបភាពរបស់អ្នកមានឥទ្ធិពល នៅអឺរ៉ុប ដោយគ្មានការអនុញ្ញាតពីអ្នកទាំងនោះ ដើម្បីក្លែងធ្វើជាស្ត្រីវ័យក្មេងផ្សព្វផ្សាយលើកតម្កើងលោក Trump និងជួយជំរុញទឹកចិត្តរបស់អ្នកតាមដានរាប់ពាន់នាក់ឲ្យបោះឆ្នោតជ្រើសរើសបេក្ខជនមកពីគណបក្សសាធារណរដ្ឋ។

គណនីទាំងនេះដែលប្រើរូបភាពខុសច្បាប់របស់មនុស្សពិត ដើម្បីបង្ហាញភាពត្រឹមត្រូវ គឺស្ថិតក្នុងចំណោម ៥៦គណនី ដែលហាក់ដូចជាជាផ្នែកមួយនៃយុទ្ធនាការត្រូវបានសម្របសម្រួល ដើម្បីជំរុញមាតិកាគាំទ្រលោក Trump។

វានៅមិនទាន់ច្បាស់ទេថា អ្នកណាជាអ្នកនៅពីក្រោយការបំភ័ន្តតាមប្រព័ន្ធឌីជីថលនេះ ឬថា តើគណនីទាំងនោះ កំពុងជួយជំរុញមាតិកាគាំទ្រ លោក Trump ដើម្បីមនោគមវិជ្ជា ឬការទទួលបានជាលុយកាក់៕