លោក Serhiy Popko គឺជាប្រធានរដ្ឋបាលយោធាទីក្រុងគីវ និយាយនៅថ្ងៃព្រហស្បតិ៍នេះថា ប្រព័ន្ធការពារអាកាសអ៊ុយក្រែន បានបាញ់ទម្លាក់យានដ្រូនប្រហែល ១៥គ្រឿង ពេលដែលរុស្ស៊ី បើកការវាយប្រហារលើកទី ៣ក្នុងរយៈពេល ៤ថ្ងៃលើរដ្ឋធានីរបស់ប្រទេសអ៊ុយក្រែនមួយនេះ ហើយស៊ីរ៉ែនដែនអាកាស បានរោទិ៍នៅទូទាំងទីក្រុងនាព្រឹកមិញនេះផងដែរ ។

លោក Serhiy និយាយនៅក្នុងសេចក្តីថ្លែងការណ៍ថា បំណែកយានដ្រូន បណ្តាលឲ្យបែកបង្អួច និងទ្វារផ្ទះល្វែងមួយខ្នង និងបណ្តាលឲ្យកើតមានអគ្គិភ័យនៅក្នុងអគារមិនមែនជាកន្លែងស្នាក់នៅរបស់ពលរដ្ឋ ដែលអគ្គិភ័យមួយនេះ ត្រូវបានទប់ស្កាត់ជាប់ ។

ចំណែកឯលោក Ruslan Kravchenko គឺជាអភិបាលតំបន់គីវ បាននិយាយដែរថា យានដ្រូននេះ ពុំបណ្តាលឲ្យមានការខូចខាតធ្ងន់ធ្ងរដល់ហេដ្ឋារចនាសម្ព័ន្ធនោះទេ នៅក្នុងតំបន់គីវ ហើយក្រុមអាជ្ញាធរទីក្រុង និងក្រុមអាជ្ញាធរតំបន់ រាយការណ៍ថា គ្មានគ្រោះថ្នាក់នោះទេ ។

លោកអភិបាលតំបន់និយាយថា បំណែកធ្លាក់របស់យានដ្រូន បណ្តាលឲ្យកើតមានអគ្គិភ័យនៅលើបរិវេនសហគ្រាសមួយកន្លែង នៅតំបន់ភាគកណ្តាល Cherkasy ហើយសេវាកម្មសង្រ្គោះបន្ទាន់ បានព្យាយាមពន្លត់អគ្គិភ័យនេះ ។

រុស្ស៊ី ដែលបានចាប់ផ្តើមប្រតិបត្តិការសឹកទ្រង់ទ្រាយធំរបស់ពួកគេកាលពីខែកុម្ភៈ ឆ្នាំ ២០២២ បានវាយប្រហារហេដ្ឋារចនាសម្ព័ន្ធថាមពលនៅទូទាំងអ៊ុយក្រែនកាលពីថ្ងៃចន្ទ នៅក្នុងការវាយប្រហារតាមច្រកអាកាសមួយដែលក្រុមមន្រ្តីអ៊ុយក្រែននិយាយថា ជាប់ពាក់ព័ន្ធនឹងមីស៊ីល និងយានដ្រូនជាង ២០០គ្រឿង ។

ការវាយប្រហារថ្មីលើបណ្តាញថាមពល បានបង្ខំឲ្យទីក្រុងគីវ ពឹងផ្អែកលើថាមពលបម្រុងគ្រាអាសន្ន និងបានកាត់ផ្តាច់ចរន្តអគ្គិសនីតាមការគ្រោងទុកក្នុងសប្តាហ៍នេះ ដើម្បីធ្វើឲ្យប្រព័ន្ធថាមពលមានស្ថិរភាពឡើងវិញ ៕