អាជ្ញាធរ នៅទីក្រុង Hamburg នៅថ្ងៃព្រហស្បតិ៍ (ទី២៩ ខែសីហា) នេះ បានឲ្យដឹងថា ប្រទេសអាល្លឺម៉ង់បានប្រាប់ប្រធានមជ្ឈមណ្ឌលសាសនាអ៊ិស្លាម Hamburg (IZH) ដែលជាប់បម្រាមរបស់ប្រទេសអ៊ីរ៉ង់ថា រូបលោកកំពុងត្រូវបានបណ្តេញចេញពីប្រទេស ហើយមានពេល ២សប្តាហ៍ ដើម្បីចាកចេញ។

ក្រសួងមហាផ្ទៃនៃទីក្រុង-រដ្ឋ Hamburg របស់ប្រទេសអាល្លឺម៉ង់ បានឲ្យដឹងនៅក្នុងសេចក្តីថ្លែងការណ៍ថា ខ្លួនបានជូនដំណឹងដល់លោក Mohammad Hadi Mofatteh ថា លោកមានពេលរហូតដល់ថ្ងៃទី១១ ខែកញ្ញា ដើម្បីចាកចេញ ឬបើមិនដូច្នោះទេ ប្រឈមនឹងការនិរទេស។ សេចក្តីថ្លែងការណ៍នោះបានបន្តថា លោក Mofatteh គឺជាប្រធាន IZH ចាប់តាំងពីរដូវក្តៅឆ្នាំ២០១៨។

យោងតាមការរកឃើញដោយទីភ្នាក់ងារស៊ើបការណ៍ក្នុងស្រុករបស់ទីក្រុង Hamburg បានបង្ហាញថា លោកគឺជាមន្ត្រីជាន់ខ្ពស់របស់មេដឹកនាំកំពូលរបស់អ៊ីរ៉ង់ គឺលោក Ayatollah Ali Khamenei នៅប្រទេសអាល្លឺម៉ង់ ក្នុងនាមជាប្រធាន IZH រហូតដល់ពេលនេះ។

សារព័ត៌មាន Bild និងប្រព័ន្ធផ្សព្វផ្សាយ NDR បានរាយការណ៍ជាលើកដំបូង អំពីបទបញ្ជាបណ្តេញចេញនេះ។ បើយោងតាមក្រសួងមហាផ្ទៃសហព័ន្ធ បានឲ្យដឹងថា គណនីបណ្ដាញសង្គមដែលពាក់ព័ន្ធជាមួយ IZH និងគេហទំព័ររបស់មជ្ឈមណ្ឌលនេះ ត្រូវបានលុបចោល នៅអាល្លឺម៉ង់ បន្ទាប់ពីប្រទេសនេះបានដាក់បម្រាមលើ IZH និងអង្គការបុត្រសម្ព័ន្ធផ្សេងទៀត កាលពីខែកក្កដា ពាក់ព័ន្ធនឹង «ការបន្តគោលដៅអ៊ិស្លាមនិយមជ្រុល»៕