បន្ទាប់ពីមានការចាប់ខ្លួនកើនឡើង នៅអាកាសយានដ្ឋានរបស់ចក្រភពអង់គ្លេស មន្ត្រីអង់គ្លេសបានព្រមានអ្នកធ្វើដំណើរកុំឲ្យនាំយកកញ្ឆាទៅពីប្រទេសថៃ ជាកន្លែងដែលសារធាតុញៀនប្រភេទនេះត្រូវបានប្រើប្រាស់ដោយមិនខុសច្បាប់។

តាមរយៈការបង្ហោះលើបណ្ដាញសង្គម កាលពីថ្ងៃពុធ (ទី២៨ ខែសីហា) ស្ថានទូតអង់គ្លេសប្រចាំនៅទីក្រុងបាងកក បានព្រមានថា ទីភ្នាក់ងារឧក្រិដ្ឋកម្មជាតិ (NCA) របស់ប្រទេស កំពុងតាមស្វែងរកអ្នករត់ពន្ធកញ្ឆា នៅក្នុងវ៉ាលិសរបស់ពួកគេ។

ការព្រមាននេះបានកើតមានឡើងនៅពេលដែល NCA បានប្រាប់ថា ខ្លួនរឹបអូសបានកញ្ឆាចំនួន ១៥តោនរួចហើយ នៅឆ្នាំ២០២៤ នេះ និងបានចាប់ខ្លួនអ្នករត់ពន្ធចំនួន ៣៧៨នាក់ ដោយចំនួនពាក់កណ្តាលនៃពួកគេពាក់ព័ន្ធនឹងសារធាតុញៀនដែលមានប្រភពទៅពីប្រទេសថៃ។

គួរបញ្ជាក់ថា ប្រទេសថៃបានកំណត់ថា ការប្រើប្រាស់កញ្ឆា គឺស្របច្បាប់ នៅឆ្នាំ២០២២ ហើយបណ្ដា «ហាង» នានា ដែលលក់ដើមរុក្ខជាតិប្រភេទនេះ ទាំងមិនទាន់កែច្នៃ ឬមូរជាបារីហើយ ឥឡូវនេះ ត្រូវបានឃើញយ៉ាងព្រោងព្រាតជាធម្មតា នៅក្នុងទីក្រុងបាងកក និងមជ្ឈមណ្ឌលទេសចរណ៍សំខាន់ៗផ្សេងទៀត។ ប៉ុន្តែកញ្ឆានៅតែខុសច្បាប់ នៅប្រទេសអង់គ្លេស ហើយអ្នករត់ពន្ធអាចប្រឈមនឹងការជាប់ពន្ធនាគារ រហូតដល់ ១៤ឆ្នាំ៕