តុលាការថៃ នៅថ្ងៃព្រហស្បតិ៍ (ទី២៩ ខែសីហា) នេះ បានកាត់ទោសឲ្យជាប់ពន្ធនាគារអស់ ១ជីវិត ចំពោះកូនប្រុសរបស់តារាសម្ដែងអេស្ប៉ាញ គឺលោក Rodolfo Sancho ពីបទប្រព្រឹត្តអំពើឃាតកម្មដ៏ល្បីរន្ទឺ ដោយបានសម្លាប់បុរសជនជាតិកូឡុំប៊ីម្នាក់ កាលពីឆ្នាំមុន នៅលើកោះទេសចរណ៍ដ៏ពេញនិយម គឺ Koh Phangan។

សេចក្តីថ្លែងការណ៍របស់តុលាការ បានឲ្យដឹងថា តុលាការព្រហ្មទណ្ឌ នៅលើកោះជិតខាង Samui បានរកឃើញថា លោក Daniel Sancho Bronchalo វ័យ ៣០ឆ្នាំ មានទោសពីបទឃាតកម្មគិតទុកជាមុនលើលោក Edwin Arrieta Arteaga វ័យ ៤៤ឆ្នាំដែលសាកសពរបស់លោក ត្រូវបានកាត់ និងលាក់ដោយជនជាប់ចោទ។

លោក Daniel Sancho គឺជាកូនប្រុសរបស់លោក Rodolfo Sancho ដែលបានសម្តែងក្នុងភាពយន្តរឿង «El Ministerio del Tiempo» (The Ministry of Time) និងតារាសម្តែងលោកស្រី Silvia Bronchalo។ តុលាការបាននិយាយថា លោកបានផ្ដល់ចម្លើយពីភាពមានទោស ក្នុងការលាក់បាំងសពជនរងគ្រោះ ប៉ុន្តែបដិសេធថា មិនបានធ្វើឃាតដោយគិតទុកជាមុននោះឡើយ។

បើយោងតាមរបាយការណ៍របស់ប្រព័ន្ធផ្សព្វផ្សាយថៃ បានឲ្យដឹងថា ក្នុងការកាត់ក្តីតាំងពីដើមដំបូងរហូតដល់បញ្ចប់ លោក Sancho បានអះអាងពីការសម្លាប់នៅខែសីហា ឆ្នាំ២០២៣ លើលោក Arteaga ដែលជាគ្រូពេទ្យវះកាត់ផ្នែកកែសម្ផស្សថា ជាទង្វើការការពារខ្លួន។ មេធាវីរបស់ជនល្មើសបានបដិសេធមិនធ្វើអត្ថាធិប្បាយអ្វីឡើយ នៅពេលត្រូវបានទាក់ទងដោយសារព័ត៌មាន Reuters នាថ្ងៃព្រហស្បតិ៍នេះ។

ដំបូងឡើយ តុលាការបានកាត់ទោសប្រហារជីវិតលើរូបលោក ប៉ុន្តែបានកាត់បន្ថយមកត្រឹមទោសដាក់ពន្ធនាគារអស់មួយជីវិតវិញ ដោយសារការពិពណ៌នាដែលរូបគេបានរៀបរាប់ប្រាប់ពីព្រឹត្តិការណ៍ អំឡុងដំណើរការឆ្លងកាត់ការស៊ើបអង្កេត។ ជាមួយគ្នានេះ ជនល្មើសត្រូវបានបញ្ជាឲ្យបង់ប្រាក់សំណងដល់គ្រួសារជនរងគ្រោះចំនួន ៤,៤២លានបាត (១៣០.២៣០ដុល្លារ)៕