បាល់ទាត់៖ ក្លិបភ្នំពេញក្រោនបានរៀបចំសកម្មភាពសប្បុរសធម៌ចំនួន ២ ក្នុងថ្ងៃតែមួយកាលពីថ្ងៃអង្គារកន្លងទៅដើម្បីអបអរសាទរខួប ១៥ឆ្នាំនៃអង្គការផ្កាយសមុទ្រឥណ្ឌូចិននៅកម្ពុជា។ កម្មវិធីនេះមានការចូលរួមផ្ទាល់ពីលោកឧកញ៉ា ឬទ្ធី សំណាង ប្រធានក្លិបជើងឯកលីគកំពូលកម្ពុជា ៦សម័យនេះ។
កម្មវិធីទី១ លោកឧកញ៉ា ឬទ្ធី សំណាង និងសប្បុរសជនជាច្រើនរូបនេះបានធ្វើការសួរសុខទុក្ខ និងចែកអំណោយជាគ្រឿងឧបភោគបរិភោគដល់ប្រជាពលរដ្ឋ ដែលកំពុងរស់នៅក្នុងសហគមន៍ក្រីក្ររបស់អង្គការផ្កាយសមបុត្រ ស្ថិតនៅជុំវិញទីលានចាក់សំរាមក្នុងសង្កាត់ច្បារអំពៅ រួមមានចំណីអាហារ ទឹកបរិសុទ្ធ ភេសជ្ជៈ អាវយឺត ក៏ដូចជាសំភារៈសិក្សាសម្រាប់ចែកដល់កុមារក្រីក្រ កំពុងសិក្សាក្នុងសាលានៃអង្គការនេះផងដែរ។ កម្មវិធីទី២ បន្ទាប់ពីការជួបសំណេះសំណាល និងចែកអំណោយ ក្រុមការងារក្លិបភ្នំពេញក្រោនដឹកនាំដោយគ្រូបង្គោលលោក Oleg Starynskyi និងអ្នកចាត់ការក្រុមលោក កែវ សុខង៉ន ក៏ដូចជាកីឡាករ សុខ បញ្ញា, យ៉ើ មូស្លីម និង Andres Nieto ជាដើម បានចូលរួមក្នុងកម្មវិធីចែករំលែកបច្ចេកទេសបាល់ទាត់ ដល់ក្រុមសិស្សានុសិស្សនៃអង្គការផ្កាយសមុទ្រ ដើម្បីបង្ហាញការអបអរខួប ១៥ឆ្នាំនៃវត្តមានអង្គការមួយនេះនៅកម្ពុជា។
កម្មវិធីនេះបានប្រព្រឹត្តិទៅដោយរលូន និងពោរពេញដោយក្តីរីករាយ ទោះបីការរៀបចំទ្រង់ទ្រាយតូចជាងរាល់ដងដោយបញ្ហាកូវីដ-១៩ និងការគោរពវិធានការសុខភិបាលដើម្បីបង្ការជំងឺកាចសាហាវនេះក៏ដោយ។ ក្នុងនាមជាដៃគូជាច្រើនឆ្នាំ ថ្នាក់ដឹកនាំក្លិបភ្នំពេញក្រោនបង្ហាញនូវសេចក្ដីក្តីសោមនស្សរីករាយ ព្រមទាំងគាំទ្រចំពោះបេសកកម្មនៃអង្គការផ្កាយសមុទ្រនារយៈពេល ១៥ឆ្នាំកន្លងមក ដែលបានរួមចំណែកដ៏សស្រាក់សស្រាំក្នុងការបណ្តុះបណ្តាលកុមារនិងយុវជនទាំងលើការសិក្សា កីឡា និងសង្គមកិច្ចនានា។ គួរដឹងថា កាលពីថ្ងៃទី៣១ ខែសីហាកន្លងមក ប្រធានក្លិបសិង្ហក្រហមលោកឧកញ៉ា ឬទ្ធី សំណាង និងសប្បុរសជននានាបានឧបត្ថម្ភជូនដល់គ្រួសារខ្វះខាតចំនួនជាង ២០០គ្រួសារដែលកំពុងរស់នៅក្នុងសហគមន៍ក្រីក្រនេះសម្រាប់រយៈពេល ៣ខែដើម្បីជួយសម្រាលការលំបាកនាអំឡុងពេលជំងឺរាតត្បាតកូវីដ-១៩ បន្ថែមពីលើការផ្តល់ចំណូល តាមរយៈការជួយទិញម៉ាស់ភ្នំពេញក្រោនដែលបានមកពី ការកាត់ដេរដោយក្រុមស្ត្រីក្រីក្រនៃសហគមន៍អង្គការផ្កាយសមុទ្រនេះទៀតផង៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
