លោកស្រី កាម៉ាឡា ហារីស (Kamala Harris) បានប្ដេជ្ញាប្រើនូវវិធីសាស្រ្តដ៏កាន់តែតឹងរ៉ឹងចំពោះអន្តោប្រវេសន៍នៅតាមព្រំដែនភាគខាងត្បូងរបស់សហរដ្ឋអាមេរិក ហើយបាននិយាយថា លោកស្រីនឹងមិនផ្អាកអាវុធទៅអ៊ីស្រាអែលឡើយ នៅក្នុងបទសម្ភាសន៍លើកដំបូងរបស់ខ្លួនជាមួយស្ថាប័នព័ត៌មាន CNN ដ៏ធំ ចាប់តាំងពីក្លាយជាបេក្ខភាពប្រធានាធិបតីនៃគណបក្សប្រជាធិបតេយ្យមក។

នៅក្នុងបទសម្ភាសន៍ជាមួយ CNN លោកស្រី Harris បានព្យាយាមបង្ហាញថាខ្លួនជាអ្នកគ្រប់គ្រងលើបញ្ហា និងផ្តល់ឱ្យប្រជាជនអាមេរិកនូវទំនុកចិត្តលើគោលជំហរនៃគោលនយោបាយរបស់លោកស្រី ជាមួយនឹងរយៈពេលតិចជាងពីរខែរហូតដល់ថ្ងៃបោះឆ្នោតនៅថ្ងៃទី០៥ ខែវិច្ឆិកា។

លោកស្រី Harris បាននិយាយថានឹងបន្តការជំរុញឱ្យមានច្បាប់ព្រំដែនដ៏ទូលំទូលាយដែលនឹងរឹតបន្តឹងការធ្វើអន្តោប្រវេសន៍ចូលអាមេរិក ហើយបានប្តេជ្ញាថានឹង «អនុវត្តច្បាប់» ប្រឆាំងនឹងការឆ្លងកាត់ព្រំដែន។ លោកស្រីក៏បានបង្ហាញជំហរគាំទ្រដូចគ្នានឹងលោកប្រធានាធិបតី ចូ បៃដិន (Joe Biden) ចំពោះអ៊ីស្រាអែល និងបានច្រានចោលការអំពាវនាវពីអ្នកចំនួននៅក្នុងបក្សប្រជាធិបតេយ្យ ដែលថាទីក្រុងវ៉ាស៊ីនតោនគួរតែគិតឡើងវិញអំពីការបញ្ជូនអាវុធទៅឱ្យអ៊ីស្រាអែល ដោយសារតែចំនួនអ្នកស្លាប់របស់ប៉ាឡេស្ទីនកើនឡើងយ៉ាងខ្លាំងនៅក្នុងតំបន់ហ្កាហ្សា។

ក្នុងបទសម្ភាសន៍រួមគ្នានឹងដៃគូប្រជែងតំណែងរបស់ខ្លួនគឺលោក ធីម វ៉លស៍ (Tim Walz) នោះ លោកស្រី Harris ក៏បាននិយាយផងដែរថា លោកស្រីចង់បន្ថែមសមាជិកបក្សសាធារណរដ្ឋទៅក្នុងគណៈរដ្ឋមន្ត្រីរបស់ខ្លួន ប្រសិនបើជាប់ឆ្នោត។ ចាប់តាំងពីក្លាយជាបេក្ខភាពប្រធានាធិបតីបក្សប្រជាធិបតេយ្យកាលពីខែមុនមក លោកស្រី Harris ទទួលបានគាំទ្រខ្លាំងនៅក្នុងការស្ទង់មតិ បង្កើនចំនួនប្រាក់រៃអង្គាសសម្រាប់យុទ្ធនាការរាប់រយលានដុល្លារ និងបានថ្លែងសុន្ទរកថាយុទ្ធនាការពោរពេញដោយកម្លាំងជាបន្តបន្ទាប់៕