ទាហានអ៊ីស្រាអែល បានសម្លាប់មេបញ្ជាការតំបន់ម្នាក់របស់ចលនាក្រុមជីហាតឥស្លាមគាំទ្រដោយអ៊ីរ៉ង់នៅតំបន់ West Bank និងក្រុមសកម្មប្រយុទ្ធបួននាក់ផ្សេងទៀត កាលពីថ្ងៃព្រហស្បតិ៍ នៅក្នុងការប្រយុទ្ធគ្នាដោយកាំភ្លើង អំឡុងពេលការវាយប្រហារធំបំផុតមួយនៅក្នុងដែនដីកាន់កាប់ដោយអ៊ីស្រាអែល រយៈពេលជាច្រើនខែមកនេះ។

យោធាបាននិយាយថា ខ្លួនបានសម្លាប់ លោក Muhhamad Jabber ដែលគេស្គាល់ថា Abu Shujaa ជាប្រធានបណ្តាញអ្នកប្រយុទ្ធនៅក្នុងជំរំជនភៀសខ្លួន Nur Shams ក្នុងអំឡុងពេលបាញ់តគ្នានៅជុំវិញវិហារឥស្លាមមួយកន្លែងក្នុងទីក្រុង Tulkarm ហើយអ្នកប្រយុទ្ធប៉ាឡេស្ទីនបួននាក់ផ្សេងទៀត ក៏ត្រូវបានសម្លាប់ផងដែរ។

កងពលនៃស្លាបប្រដាប់អាវុធរបស់ក្រុមជីហាតឥស្លាម Tulkarm បានបញ្ជាក់ពីការស្លាប់របស់លោក ដែលនាំឱ្យចំនួនសរុបនៃពលរដ្ឋប៉ាឡេស្ទីន ដែលត្រូវបានសម្លាប់ក្នុងរយៈពេលពីរថ្ងៃកន្លងទៅនេះ កើនឡើងដល់១៧នាក់ ។

ប្រតិបត្តិការនេះ បានចាប់ផ្តើមកាលពីព្រឹកថ្ងៃពុធ ដោយទាហានអ៊ីស្រាអែលរាប់រយនាក់ត្រូវបានគាំទ្រដោយឧទ្ធម្ភាគចក្រ យានដ្រូន និងរថពាសដែក បានវាយឆ្មក់ចូលទីក្រុង Tulkarm ទីក្រុង Jenin និងតំបន់ជាច្រើនទៀត នៅក្នុងជ្រលងភ្នំហ្សកដានី។